Ikasteko baliabideak

Web2.0 honetan gehien erabiltzen direnetako bat etiketa-laino edo tag cloud izenekoak dira. Hitz batzuk agertzen dira berton, tamaina agertzen den maiztasunaren araberakoa izaten da, sarrien agertzen direnak handiago eta gutxien agertzen direnak txikiago. Halako hitz-laino edo letra-zopa osatuz.

Karraju honetan berton bloga, klaserako baliabideak eta eduki mota guztien kategoriak erakusteko erabiltzen ditugu adibidez.

Ez zaizkio jende guztiari gustatzen, baina onartu behar da estetikoki eta grafikoki indartsuak eta erakargarriak direla.

Esan dugun bezala, blog edo webgune baten gehien zertaz egiten den berba adierazteko erabiltzen dira, baina kategorien zerrenda bati ez ezik, edozein testuri aplikatu ahal zaizkio, horrela gehien erabiltzen diren berbak nabarmenago agertzen dira.

Egia esanda, orain ez zait okurritzen klaserako zehazki zertarako erabili daitezkeen, idazmenarekin lotutako kontuetarako seguru asko: zuzenketa, testuen eta lokailuen azterketa, hiztegia,... irudimen-lana zuen esku utziko dut.

Adibide modura, webgune honetan AEBetako presidentearen diskurtsoen hitz-lainoa daukazue ilustrazio eta pista gisa erabili ahal duzue. Ez dago espero ez genuen ezer, ezta?

Bestalde, sarean badira nahi duzun testua sartu eta lainoa sortzen duten zerbitzuak, bi aipatuko ditut:

• Tag Crowd
• TagmyCloud

Hemen daukazue Karrajuko artikulu baten lainoa:

Karrajua hitzaren ingurukoak topatzen Asier Sarasuaren Eibartik blogean agertu naiz. Han aspaldian egin zuen berba honen aipamena, bera hasi eta iruzkingileek jarraitu.

Eibartik blogean bertako euskalkia, etnografia eta naturaren inguruko kontuak ekartzen dizkigu Asierrek.

Bloga irakasle eta ikasleentzako baliabide interesgarria izan daitekeela uste dut, ahozko hizkuntzaren inguruko informazioa jasotzeko gehien bat: esaerak, hiztegiak, testuak,... eta ez Eibartarrentzat soilik, mendebaldeko hizkeraz, herri-hizkeraz eta euskara biziaz oro har interesa daukan edonorentzat baino. Euskaltegietan ere Euskaltzaindiaren arauez gain, euskara hori ere interesatzen zaigu ezta?

Bestalde, Eibartik blog hau eredu ona da nire ustez blogek eduki dezaketen funtzio didaktiko-dibulgatiboa erakusteko. Ahozko hizkera modu erakargarri eta erraz baten (ikaslearentzat adibidez) ezagutarazteko kasu honetan. Baten batek bere (inguruko) hizkera zabaldu, ezagutarazi eta gaurko euskarari harekin ekarpena egin  nahi badio, hemen dauka kopiatzeko eredu ona.

Topagunea, euskara elkarteen federazioak abenduan antolatu zuen II Ikusentzunezkoen Rallyko filmak Youtuben jarri ditu ikusgai. Filma laburrak eta amateurrak kasu gehienetan, baina erabilgarriak ere izan daitezke.
Hona hemen lehenengo saria:

Ikasbil-en bidez jaso dugu webgune honen berri. Han eman duten aurkezpena ekarri dugu hona:

Euskalnatura.net natura eta zientziaren gaineko informazioa euskaraz eskaintzea xede duen web gunea da. Naturak eta zientziak interneten duten presentzia urriari aurre egiteko asmotan sortu zen 2006ko urrian, ahalik eta informazio gehien batzeko asmoz. Euskal Herriko Unibertsitateko ikasle gazte talde batek sortu, mantendu eta eguneratzen dihardu. Naturaren eta zientziaren gaineko informazioaz gain, hainbat erreportaje, foroak, argazki-galeria, natur ekintzen gaineko agenda eta abar aurki daitezke web gunean.

Apurka-apurka informazioa gehitzen ari dira eta egun informazioz beteriko 200 orrialdetik gora aurki daitezke. Web gunea hiru atal nagusitan banatzen da: naturaren gaineko informazioa biltzen duen atala (Euskal Herriko animalia, landare, onddo eta natur guneen gaineko informazioa biltzen duena), zientziaren atala (Besteak beste, biologia, geografia, kimika eta ingurugiro zientzietako informazio biltzen duena) eta laster prest izango den erreportajeen atala (askotariko gaiei buruzko erreportaje edo dossierrak bilduko dituena).