blogak

Web2.0 honetan gehien erabiltzen direnetako bat etiketa-laino edo tag cloud izenekoak dira. Hitz batzuk agertzen dira berton, tamaina agertzen den maiztasunaren araberakoa izaten da, sarrien agertzen direnak handiago eta gutxien agertzen direnak txikiago. Halako hitz-laino edo letra-zopa osatuz.

Karraju honetan berton bloga, klaserako baliabideak eta eduki mota guztien kategoriak erakusteko erabiltzen ditugu adibidez.

Ez zaizkio jende guztiari gustatzen, baina onartu behar da estetikoki eta grafikoki indartsuak eta erakargarriak direla.

Esan dugun bezala, blog edo webgune baten gehien zertaz egiten den berba adierazteko erabiltzen dira, baina kategorien zerrenda bati ez ezik, edozein testuri aplikatu ahal zaizkio, horrela gehien erabiltzen diren berbak nabarmenago agertzen dira.

Egia esanda, orain ez zait okurritzen klaserako zehazki zertarako erabili daitezkeen, idazmenarekin lotutako kontuetarako seguru asko: zuzenketa, testuen eta lokailuen azterketa, hiztegia,... irudimen-lana zuen esku utziko dut.

Adibide modura, webgune honetan AEBetako presidentearen diskurtsoen hitz-lainoa daukazue ilustrazio eta pista gisa erabili ahal duzue. Ez dago espero ez genuen ezer, ezta?

Bestalde, sarean badira nahi duzun testua sartu eta lainoa sortzen duten zerbitzuak, bi aipatuko ditut:

• Tag Crowd
• TagmyCloud

Hemen daukazue Karrajuko artikulu baten lainoa:

Blogarien arteko jolasa-edo da "memeen" asuntu hau. Batek galdera edo gai batzuk proposatu eta erantzun eta beste batzuei luzatzen die gauza bera egiteko gonbitea, haiei behin eginda berdin egin dezaten eskatuz. Halako katea-edo sortzen da blogetik blogera.

Euskal blogosferara bat heldu da azkenotan: "Niri buruz ez dakizkizun bost gauza" izenekoa. Gaur sarean.com-ko Jabi Zabalari heldu zaio, baina lehendik hainbat blogetatik pasatu da: Katixa Agirre, Harrikadak,... eta aurrera jarraitzen du.

Zertara ekarri dut hau klaseko baliabideak sorta honetara? Erraza, blogekin hasi nahi dutenek askotan ez dakite nola lortu ikasleek blogean parte hartzea edo idaztea. Hau era erraz, erakargarri, atsegina eta polita izan daiteke, beste barik.

Meme batzuetarako ideiak:

• Irakasleari erreparatu diozun gauza bat (akatsak, maniak,...)
• Euskara ikastean zailak egiten zaizkizun hiru gauza.
• Norekin hitz egin nahi zenuke euskaraz?
• Klasean inoiz aitortu ez duzun zerbait?
• .... gehiago?

Karrajua hitzaren ingurukoak topatzen Asier Sarasuaren Eibartik blogean agertu naiz. Han aspaldian egin zuen berba honen aipamena, bera hasi eta iruzkingileek jarraitu.

Eibartik blogean bertako euskalkia, etnografia eta naturaren inguruko kontuak ekartzen dizkigu Asierrek.

Bloga irakasle eta ikasleentzako baliabide interesgarria izan daitekeela uste dut, ahozko hizkuntzaren inguruko informazioa jasotzeko gehien bat: esaerak, hiztegiak, testuak,... eta ez Eibartarrentzat soilik, mendebaldeko hizkeraz, herri-hizkeraz eta euskara biziaz oro har interesa daukan edonorentzat baino. Euskaltegietan ere Euskaltzaindiaren arauez gain, euskara hori ere interesatzen zaigu ezta?

Bestalde, Eibartik blog hau eredu ona da nire ustez blogek eduki dezaketen funtzio didaktiko-dibulgatiboa erakusteko. Ahozko hizkera modu erakargarri eta erraz baten (ikaslearentzat adibidez) ezagutarazteko kasu honetan. Baten batek bere (inguruko) hizkera zabaldu, ezagutarazi eta gaurko euskarari harekin ekarpena egin  nahi badio, hemen dauka kopiatzeko eredu ona.

Klaserako baliabideak biltzen dituen atal honetan ariketak, entzungaiak, testuak, hiztegiak eta halakoak agertzen izan dira, ez eguneroko gauzez jarduten duten blogak. Klaserako baliabideak izan daitezke halakoak? Baiezko kontua esango zenukete askok seguruenik, baina halako sailkapen "serioan" sartzeko orduan dudak seguru asko. Nik ez dut dudarik eduki, erabili egiten dut eta.

Ez dut klaserik ematen orain, baina badakizue berbalagunean ibiltzen naizela, eta ez dakizue zenbat biderrez erabili ditudan Patxitraperoren kontuak eta pasadizoak elkarrizketa eten eta elkarri begira geratzen diren une horiek salbatzeko. Mintzagai ona eta hizpidea eman ditzaketeten gauzak, mintzalagunean, mintza saioetan eta klasean mintza praktikarako momentuetan erabiltzekoak. Kontatzen dituenak gainera banan banan hartuta seguru beste hainbat gauza egiteko ideia ematen dizuela. Eguneroko gauza horiek guztiek irudimen apur batekin milaka hizpide eta gogoeta ekartzen dizkiguten bezala.

Horixe ba, eskerrik asko Patxi, eta egiozue bisita, zerbait topatuko duzue eta.