iktak

on-line edo ez on-line

Abuztuan jakin genuen HABEren ikasturte hasiera honetarako prestakuntza-eskaintzaren berri. Haien artean, azkenotan ugaldu diren bezala, teknologia berriekin lotutako ikastaro berriak ikusi genituen: Podcastinga, Wikiak eta Ikaskuntzaren eraketa: on-line eta aurrez aurreko lana uztartuz izenekoa.

Blogen eta wikien inguruan jardun da aurreko urteotan, baina ikastaroak amaitu eta ez dirudi hango esperientziek jarraipenik izan dutenik (publikoan behintzat). Probako blogak sortu ziren adibidez, baina haietako gutxik iraun dute gaur arte, eta berririk ez dugu ikusi apenas.

Oraingoan ere probatan ibili dira batzuk, podcasting-arekin adibidez hemen edo hemen. Lehengo astean hala ere, Jon Antxiaren blog berpiztuak eman zigun sorpresatxoak: On-line eta aurrez aurreko lana uztartuz mezuan izen bereko ikastarokoak aplikatzen hasi eta haren berri emango zigula. Baita hasi ere Ikasleei plataformaren berri eman diegu mezuarekin.

Teknologiaren aplikazio didaktikoa -ez dakit arrazoiarekin edo arrazoi barik- autoikaskuntza eta urruneko ikaskuntzarekin lotzeko joera daukagu, gehienez b-learning edo eredu misto (nahikoa lausoa) delakoarekin. Eta gaur egun teknologia hitzaren zabal-zabalean aplikazioak noranahikoak eta nonahikoak izan daitezke. Ikastalde klasikoetan, bai eskola jardunean bertan, bai eskola-denborako osagarri modura, "etxeko lanak" egiteko baino ez bada ere. Alde horretatik Jonen esperientza jarraitzea interesgarria da duda barik, eta kontatzea eskertzekoa.

Bestalde, bitartean HABEk lan-taldeak antolatu zituen autoikaskuntza eta eredu mistoak aztertzeko. Ez daukagu oraindik haien ondorioen berri (hemen ibiltzen den baten batek akaso), laster etorriko dira seguraski. Ez da gauza bera izango balizko eredu msitoa eta aurrez aurreko taldeetan teknologiaren aplikazioa, baina era berean, ez dut uste konpartimentu isolatuak direnik ere. Gehienez continuum batean kokatzeko puntuak. Online-etik off-line-era?

Video killed...

80etako kantu ikur haren doinua etorri zait ezpainetara egunotan bi biderrez. Badakizue, berba bat sarri entzun eta asoziazio mentalak eginda erraza da berba aipatzen den kantuaren doinua ahotan amaitzea.

Lehengoan materiala egiten dabilen lankidea topatu nuen bati eta besteari kontsultan. Ataza egin duela, eta jarduera batean bideoa erabili behar dela, eta bideo hori zelan banatuko ote dien hango eta hemengo irakasleei.

Argitzeko, esango dizuet AEKn materiala diseinatzen lagun batzuk dauzkagula, atazak gehien bat. Atazok sarearen bidez zabaltzen ditugu gure euskaltegietara. Testuak maketatu eta PDF formatuan ipintzen ditugu intranetean. Testuekin batera ikusentzunezko materialak zabaldu behar direnean, orain arte ez dugu aparteko arazorik eduki: Ikasbileko entzungaiak erabili, edo mp3 formatuan eskegi ditugu zuzenean. Bideoekin ere orain arte HABEtik banatzen dituzten DVDetan daudenak erabili izan dira. Baina arazoa euskaltegietan ez dagoen bideo bat zabaldu behar denean agertu da.

Bigarrengoz, Hizpide 65en Mari Jose Lasherasen artikulua irakurtzen etorri zitzaidan kantua. 38. orrialdean kontatzen digu zelan egin duten ikastaroan ikasleei aditu batzuen hitzaldien zatiak DVDan banatu behar izan zizkieten ikasleei bestela zerbitzarian pisu handia hartuko zutelakoan.

Bideoak irratiko izarrei ez ezik, guri ere ematen digu burukominik nonbait. Hizkuntzen irakaskuntzan ikusentzunezko dokumentu eta materialak metodo audiolingualaren sasoitik pisua hartzen joan dira, eta gaur egun inor gutxi ikusiko dugu klasean edo ikas-prozesuan entzungai edo bideorik inoiz erabili ez duenik. Kaseta lehenengo, VHSa gero...

Teknologiaren berrikuntzaz dihardugu sarri sarean, interneten begiak ipinita... badakizue: blogak, wikiak, web2.0, Moodle eta enparauak. Baina, esango nuke geure bizimoduan azken urteotan bizi izan dugun iraultza teknologiko handiena etxean daukagula, ez sarean.

Bistan daukat egongelako bazter batean musika-ekipo zaharra, kaseta eta platoa. Aspaldian ikutu barik. Telebistaren azpian DVD eta dekodifikadorearen azpian hautsaren azpian barruntatzen dut VHS zaharra. Apal batean kaseteak, biniloak eta bideo-zintak. Mahai gainean mp3 erreproduktorea agertu da USB giltzaren ondoan, eta han eta hemen DVDak eta CDak ere hautsa hartzen hasi dira disko gogor multimedia ekarri genuenetik. Eta kaxoi bat zabaldu, eta han albuma, duela urte batzuetako argazkiak, aspaldi ez da berririk sartu, kamara digitala etxean sartu zenetik..

Euskaltegietara ere heldu da iraultza hori nonbait. DVDak, mp3a irakurtzen dituzten CD erreproduktoreak... Baina bideoekin dantzan hasita oraindik (eta berrikuntza horregatik akaso) topatzen ditugu trabak.

Saiatu naiz bideoaren kontu honi buelta pare bat ematen. Luzetxoa irten zait, eta hala ere ez da gida zehatza. Gure lanean bideoa erabiltzeko arazo teknikoak zerrendatu eta irtenbide posibleak zirriborratzeko saiotxoa baino ez da. Esan bezala, alderdi teknikotik, alderdi didaktikoa bestelako kontua da eta.

Bideoa baliabide didaktiko modura erabiltzea prozesu baten modura irudikatu dut, lau pausokoa. Ikus dezagun fase bakoitzean zer daukagun, sakatu atal bakoitzaren gainean irakurtzeko.

1. Sorkuntza-grabazioa
2. Edizioa-egokitzapena
3. Banaketa-partekatzea
4. Erreprodukzioa
5. Ondorio bidean

Mezu laburra nahi eta idatziaren idatziaz artikulu luzea egin da, hala ere ez dago oso dokumentatuta, ezta sobera landuta ere. Bideoarekin dauzkagun buruhausteen artera argi apur bat ematea baino ez da izan asmoa. Inork artikulutik tiratzen jarraitu nahi badu eta zerbait landuago egin, wikian ipini dut. Beraz osatu, aldatu edo findu nahi bada han dago erabilgai, zerbaitetarako erabili ahal bada.

m-learning

Gabinete de Informatica blogaren bidez termino berriaren albistea heldu zait: M-learning. Terminoa diot, ze funtsean aspaldian barruntatzen den kontua dabil atzetik: gailu mugikorrek ikaskuntzara ekar dezaketena.

Artikulua ondo garatuta dago, irakurtzea gomendatzen dizuet.

Han esandakoetatik gauza batekin geratu naiz, Mlearning kontzeptuaren helduleku desberdinak: gailu mugikorren bidezko ikaskuntza kontsideratu daiteke erraz-errazenean, baina funtsean ikaskuntza bera ere mugikorra izan daitekeela gogorarazten digu. Azkenik, gogoeta batera eraman gaitzake honek guztiak: ikasteko ingurune estatikoa behar dugu?

Buelta bat gehiago emanda beste gogoeta bat: ikasten duena mugitzen da, baina ingurua, ikastearen objektua, gehiago, gero eta gehiago. Mugikortasun fisikotik harago goaz nonbait.

Zientzia-fikzioaz ari garela pentsatzen hasita egongo da norbait honez gero, albiste hau duela hilabete batzuetakoa da ordea. Bai, mp3-4-5ak, segapotoak, iPodak, PDAk eta etortzeko daudenekin osatzen den trasteria guztia, horiexetaz ari gara. Twitter-en familia guztia ere hor daukagu bestela, eta, errezeloak errezelo (ez dira gutxi), mobilerantz apuntatzen dute horiek.

Estekak:

• m-learning: dispositivos para nuevos entornos de aprendizaje (gabinete de informatica)
• m-learning wikipedian (ingelesez)
• m-learning wikipedian (gaztelaniaz)
• mlearning ataria (Txile)

Karrajua.kom

Gaur Joxe Arantzabalen blogean interneten sare sozial deitzen direnen inguruko mezua irakurri dut. Ning izeneko baten berri ematen digu hain zuzen ere.

Interneteko sare sozialak azken baten gune bateko erabiltzaileak interesen, gustuen, beharren edo gaien arabera batzen da. Talde horietako bakoitzari komunikaziorako baliabide desberdinak ematen zaizkio: blogak, foroak, fitxategien direktoriak, multimedia biltegiak, wikiak, eta abar. Foruen kontzeptu tradizionala osatuago nonbait. Gauza askotarako baliagarria izan daitezke: iritziak trukatzeko eta eztabaidatzeko, proiektuak bideratzeko eta jarraitzeko, fitxategiak eta dokumentuak konpartitzeko edo osatzeko, jarduerak eta ekimenak antolatzeko, edo beste barik, gai baten inguruan jarduteko.

Ning horrezaz gainera sare sozialak sortzeko eta antolatzeko hainbat eta hainbat tresna daude, eta inoiz hemen egin diegu erreferentzia batzuei: Orkut, Goingon, Elgg,... beste asko eta asko gehiago daude. Batzuk edozelako sareak sortzekoak izaten dira, eta beste batzuk gai edo interes batzuen ingurukoak. Hemen daukazue wwwhat´s new webgunearen zerrenda adibidez. Hor abaniko handia aurkituko duzue.

Aspaldian esan nuenez, karrajua.com domeinua daukat hartuta probak egiteko. Azkenengo proba Drupal 5 instalatzea izan da, eta instalazioarekin teknoendredatzen zer egin pentsatzen nenbilela Groups.Drupal ezagutu nuen, Drupal komunitateko kideak proiektu desberdinen arabera antolatzeko sare soziala. Gainera berton azaltzen dute zelan dagoen konfiguratuta.

Horrela bada, antzeko zerbait imitatzen saiatu naiz. Eta karrajua.com-en "com" horretatik tiratuta komunitatea edo sare soziala antolatzeko gunea sortzea okurritu zait. Euskalduntzean dabilen jendeari interesen araberako taldeak antolatzeko aukera ematea. Proiektuak talde-lanean garatzeko edo ikastaroak emateko ere balio dezake, Moodle-ek baino baliabide gutxiagorekin, baina malgutasun handiagoarekin aldi berean.

Kontua da alde batetik interesgarria iruditzen zaidala horrelako zerbait, baina ez dakit euskalduntzearen mundu honetan zerbaitetarako balioko lukeen. Patxitraperok aspaldian bota zuen sare sozial moduko zerbait sortzeko proposamena, eta erantzun gutxi eta baten bat eszeptikoa ere eduki zituen.

Beraz, eskertuko genizueke karrajua.com horri bisitatxoa egin eta iritzia ematea. Sartu eta saltseatu beldur barik.

Erabiltzeko sortu kontu berria ipintzen duen lekuan klikatu eta kontua sortuko duzue. Behin barruan dagoen talde batera batu, edo talde berria sortzeko aukera edukiko duzue. Talde bakoitzean momentuz hiru motako edukiak sortu ahal dira: istorioak edo mezu arruntak (blog baten antzera), liburuak edo testuak (wikia izatera heldu gabe, testu egituratuak sortu daitezke) eta inkesta sinpleak. Baliabide gehiago ipini daitezke, ideiaren bat badago, edo Drupal.org-en modulu interesgarriren bat ikusten baduzue, esan eta saiatuko gara probatzen.

Esan dudan bezala, proba baino ez da, hutsune asko dauzka oraindino (itzulpena, diseinua, antolaketa,..). Alpha bertsioan barik, alfalfa bertsioaren demoa edo jolasa baino ez dela esan daiteke, baina ideia nondik nora doan igarri daiteke.

Zer deritzozue? Merezi du horrelako zerbait antolatzea?

Esteka:

• karrajua.kom

Wiki-wiki

Hizpide 62 irakurtzen hasi naiz, Internet ikasgelan: Wikiak artikulutik hain zuzen ere. Wikiaren definizioa lantzen saiatu dira lehenengoz, gero webpaint zerbitzuan wikia nola sortu azaltzen dute eta azkenengoz erabilpen didaktikoen gainean ideia eta esteka batzuk ematen dituzte. Azkenengoz http://idazketatailerra.wetpaint.com helbidean idazmena lantzeko ikastaro baten parte bezala sortu duten proba azaldu digute gainetik.

Wikien balio didaktikoaz asko egin da berba azkenotan hezkuntza eta formazioaren inguruko guneetan. Baina egia esanda, denok aukera kopuru ikaragarria ikusten diogun arren, martxan konbentzitzen nauten esperientzia gutxi ikusi ditudalakoa daukat. Blogen antzera, "wiki interruptus" asko dabiltzala uste dut. Eta lastima da.

Kasu honetan ere Natxok eta Agurnek proba batekin erakusteko ahalegina egin diguten arren, uste dut teknologia-kontu hauekin dabilen beldur-fobia-ezjakintasuna gainditzeko jendeari zerbait inpaktanteago eta argiagoa erakutsi behar zaiola. Benetan funtzionatzen duen wikia, apur bat espektakularra ahal bada. Artikuluan hala ere, ahalegina egin dute adibide praktikoa sortzeko, eta hori zerbait bada. Asko dira teknologia berriaren marabilak predikatzen dituztenak ezer probatu barik. Ea wiki horrek zer ematen duen.

Wikiaren kontzeptuarekin berarekin daukat sentsazio hori. Wikia oso kontzeptu sinplea da, argia, idatzi zerbait, erakutsi, nahi duzunean aldatu dezakezu, aldaketak gordeta geratzen dira, eta gainera askoren artean idatzi daiteke. Baina, ez dakit zergatik, izenagatik agian, ikaragarri kostatzen da ulertaraztea. Jende askok iniziatuentzako kontzeptua dela segitzen du pentsatzen.

Behin wikiekin hasita egileei proposamentxoa botako diet. Zergatik ez dituzue ipintzen orain arte argitaratu dituzuen hiru artikuluok (webquest-ak, blogak eta wikiak) wiki baten? Horrela denok eskurago izateaz gainera, zuek (eta zuekin kolaboratu ahal duen jendea) eguneratzen eta osatzen joan zaitezkete: ideiak, estekak, lanak, zuzenketak... Ez da formaziorako ideia ona eta webdosazero totala?

Youtube hizkuntza ikasteko

Planeta Educativo metabloga gauza interesgarrien iturri oparoa izaten da. Blog askoren segimendua egiten du, tartean hizkuntzen irakaskuntzaz diharduten asko. Bisita egitea gomendatzen dizuet, eta gehien bat haren jariora harpidetzea.

Gaur adibidez, teknologia berriak gora eta behera (badakizue webdosazero-eta) gabiltzala, El blog de Lola izenekoan gaztelania ikasteko Youtuberen aukerez post hau topatu dut.

ELE en Youtube

Interesgarria, ezta?

Klonak

Karrajuaren lehenengo klona mahatsorriak.org-en abian ipini nuenetik aukerak topatzen jarraitu dut. Karrajua bi blog horretan joan naiz horren berri ematen hain zuzen ere (poliblogariaren bizitza itogarria da, benetan, izan zaitezte zuen betiko blogari fidel, blogosferan adarrak ipintzen neke-neke eginda akabatzen duzu).

Pentsatu dut sasoia izan dela orain arteko klonen zerrenda egiteko. Hona hemen:

1. http://karrajua.schtuff.com | Schtuff
2. http://karrajua.wetpaint.com | Wetpaint
3. http://www.bildu.net/bookmarks/bontxi/klaserako | bildu.net (estekak)
4. http://www.alesti.org/?public=karrajua | Alesti (jarioak)
5. http://docs.google.com/View?docid=ah89qfjb3tsm_5dmtcvg | Google docs (dokumentu bakarra)
6. http://karrajua.wikispaces.com | Wikispaces
7. http://karrajua.wufoo.com/forms/idatzi-eiguzu | Wufoo (formularioak)
8. http://xfruits.com/bontxi/eklblogak | Xfruits (jarioak, metabloga)
9. http://karrajua.netcipia.net | Netcipia
10. http://karrajua.terapad.com | Terapad
11. ...eta baten bat daukat hortik ahaztuta, seguru.

Batzuk ia gune osoa ordezkatu dezakete. Azken biak gehien bat. Beste batzuk funtzionalitate batzuk baino ez dizkiote ematen. Baina tontamentean eta denbora asko eman barik gauzatxoak irteten dira. Ahaztu barik hauetako bakoitzak hainbat aukera dauzkala.

Lehengo ondorio berdina, konpartitzea eta zabaltzea inoiz baino errazago. Orain, klon horiek guztiek falta duten bezala, zer konpartitua eta konpartitzeko gogoa eduki behar da.

EGA ikastaroa

EGA ikastaroa - Azkenaldi honetan, erabat murgilduta nago Moodle plataformaren ur sakonetan. Iaz gure Axularreko lagunei, besteak beste, e-learning edo plataforma birtual honek eskain dakizkigukeen mila aukerei buruz luze entzun ondoren, udan buru-belarri sartzea erabaki nuen. Gaia erabat interesgarria iruditzen zait gure irakasgaiak modu ezberdinez fokatzeko aukera ematen digun neurrian (ikasleen gorabeheren gertuko jarraipena, baliabide guztiak gelan [...] [IKTeroak]

Moodle plataforman EGA ikastaroa diseinatu dute Jakintza ikastolan. Irekita utzi digute bisitatzeko eta ideiak hartzeko. Gurean ere horrelako gehiago egingo bagenitu! Ala espioitza industrialaren beldur gara?