Blogak

Euskaltegiak euskaldundu?

Azterketa eta ebaluazioaren sasoian gaude duda barik. Zer esana eman dute azterketek, blogosferan ere bai, irakasleak zein ikasleak gabiltza azterketak ahotan, duela urte pare batetik hona zer esan nagusi egin zaigu maiatz-ekain bueltan.

Azterketen kontu honez gain, beste kontu bat ere etorri zaigu azkenotan eskola mundutik. Eskolak ez duela euskalduntzen edo ez duela beharko lukeen adina euskalduntzen. Gazteek eskola-eredu desberdinetan lortzen duten euskara maila ez dela nahikoa izaten eta kanpaina ere jarri zen martxan. Kanpaina hau epaitegietara ere heldu da.

Eta azterketak bateko, eskolak euskaldundu ez euskaldundu besteko, euskaltegiok ere hizkuntzaren transmisiorako tresna garen partetik galdera gurera ekartzea otu zait: Euskaltegiak euskalduntzen du?

Lehenengo erantzun posiblea: Hori ezin da neurtu, oso zaila da,... Bai? Seguru? Ez dago euskaltegion emaitzak neurtzeko modurik? Une honetan zaila da, bai, adierazle batzuk egon daitezke hala ere.

• Erroldetan eta datu estatistikoetan helduen artean euskararen ezagutzaren neurketak eta haren bilakaera. Euskararen datu basean edo Eustaten datu-bankuak ditugu besteak beste.
• HABEk edo euskaltegiok daukagun informazioa: gainditze tasak, eskuratutako maila, euskara ikasten ibilitakoen kopuruak, ...
• Eta bai, azterketen emaitzak. EGA, 1 eta 2 maila, edo HHEEen gainditze tasak urterik urte.

Datu bildumatxoa badago beraz, eta ikerketaren bat ere egin izan da. Duela ia 10 urte SIADECOk egin zuena adibidez. Zaila izango da neurtzea, baina ezin dela esateko atxakiarik ez dago nire ustez. Honek seguruenik bigarren erantzun posiblera eramango gaitu: Datuak ez dira fidagarriak, beste faktore asko daude,... Eta honi arrazoirik ez zaio faltako neurri baten. Dena dela, askotan horren atzetik beste gauza batzuk daudela uste dut: informazio hori ez dakigu tratatzen, beste datu batzuei erreparatzea errazago egiten zaigu (ikasle kopuruak, talde-orduak,...), edo akaso balizko ikerketa horren emaitzaren beldurra, hau da, geure buruari "azterketa" egitearena.

Ez nuke inondik ere helduen euskalduntzearen lana eta emaizak zalantzan ipini nahi. Baina gogoratu beharko genuke euskaltegiak hizkuntzaren normalizaziorako tresnak direla, eta, nire ustez, gure lanaren balorazioa hortik bideratu beharko litzateke: euskara gure herrian hizkuntza "normala" izan dadin zer lortzen ari gara? Gure ahalegina (pertsonala, ekonomikoa, soziala,...) emaitzen parekoa da?

Neuk ere ez dut ikerketarik egin, baina eskolaren kasuan Iñaki Martinez de Lunak Hiznet ikastaroaren blogean dioenak hausnartzeko bidea ematen digula uste dut:

Azkenik, euskararen irakaskuntzan eragiten dituzten baldintzen artean, gizartearenak ditugu. Asko errepikatu zaigu eta nahikoa ezaguna dugu eskolak bakarrik ez duela euskaldunduko; eta hori egi-egia da. Lehendabizi, sozializaziotik eratorritako imitazio mekanismoa dagoelako: alegia, neska-mutikoek familian, lagunartekoan, kalean, hedabideetan eta abarretan ikusten dutena barneratu ondoren, errepikatzen saiatzea; baita eurei erakargarriak zaizkien idoloen balio-eskala, janzkera, estiloa, portaerak eta, nola ez, hizkuntzaren erabilera ere (hizkuntza hautua, hizkera mota...). Eta gazte euskaldun gehienek eremu oso euskaldunetakoek izan ezik egun dituzten harreman sareak ia guztiz erdaldunak direla erreparatu behar dugu. Bigarrenik, euskaldundu den edo euskalduntzen ari den gazte jendeak euskara erabiltzeko gizarte baldintza egokiak aurkitu behar ditu, erabiltzen ez den hizkuntza herdoiltzen delako. Hirugarrenik, umeak euskalduntzeko herri honek hainbat ahalegin egin ondoren, hori lortu dutenei euskara erabiltzeko gizarte aukera gehiagorik ez ematea, plangintzaren ikuspuntutik, zentzugabea litzatekeelako.

Euskaltegiok zerbait egin dugu, bai, hainbat jende "euskaldundu" dugu, baina ikasitako hori euskaraz funtzionatzen duten eremu sozial batzuetara eroan ezin dugun bitartean ahalegin pedagogiko-didaktiko-metodologiko guztiek ez dute behar den besteko fruiturik emango, eta erraza izango da gure eta ikasleen ahalegin guztia "herdoiltzea", txikitan eskolak ikasitako ingelesa askori heldoildu zaigun modura.

Gure lana beraz, ez dezagun gaindituen tasetan bakarrik neurtu (adierazle horri baliorik kendu gabe hala ere), eta hasi gaitezen pentsatzen gure lana normalizazio-prozesuarekin integratzeko era baliagarriak zeintzuk izan daitezkeen. Eta horrek seguruenik hausnarketa, formazioa, prozesu honetako beste eragileekin elkarlana eta komunikazioa eta helduen euskara irakaslearen paperaren birdefinizioa ere ekarri beharko luke, hizkuntz-irakaslea izateaz gainera normalizazio-eragilea ere izatera. Eta inplikazio pedagogikoak ere bai, hizkuntza irakastearekin batera normalizatzeak dakartzakeenak.

Ez dut uste ez euskalduntzeagatik inork epaitegira eroango gaituenik, baina azterketa kolektiboa gainditu behar dugu, geuk eta geurekin dabiltzan guztiek. Eta azterketa hori ez da ekainean bakarrik egiten.

Spam-a iruzkinetan: captcha

Lehenago edo geroago heldu behar zen spam-a, eta gaur izan da eguna. Orain arte karrajuan asko ez zutela salduko eta hau aurkitzea kostatuko zitzaielakoan ez dut iragazkirik jarri. Bi mezu heldu dira eta horrek esan nahi du baten baten agendan gaudela eta gehiago bidaliko dituela.

Eskatu gabeko publizitate eta post-en kontra arma batzuk daude. Karrajuko arsenalean hasieratik eduki dugu bat, kargatu barik baina posizioan: captcha. Captchak komentarioa edo zerbait bidaltzeko orduan letren konbinazioekin agertzen diren irudi txikiak dira. Letren konbinazioa tekleatu behar da bidaltzen duena orria ikusten ari dela egiaztatzeko. Ez du aparteko ahaleginik eskatzen, eta erregistratu gabe iruzkinak bidaltzen uzten du.

Beraz, hemendik aurrera komentarioa bidali nahi duzuenean iruditxo horretan agertzen diren letrak irudiaren azpian dagoen koadroan tekleatu behar dituzue. Ez da zaila eta karrajua saltzaile eta spameroetatik libratzeko tresna ona izaten da. Espero dut horregatik ezer interesgarria publikatu gabe ez geratzea. Arazoren bat badago harreman-formularioaren bidez esan.

Lehia

Hizpide 61aren gaineko aurreko mezuari segida ematen lan elegantea egin digu plisti-plastak (txalo txaparrada bero-beroa entzun nahi dut). Artikuluak irakurri eta burutazio piloa utzi dizkigu komentarioetan (txalo gehiago), eta gainera niri beste post baterako gaia jarri dit (oraindino ez dut ron botila hori topatu, baina tenperatura jaisten denean tragoa eginda dago!).

I+Gren aipamena egin digu:

I + G ren beharrean gara euskararen irakaskuntzaren zenbait alorretan. Bada garaia honetaz norbait ardura dadin. Ez dakit HABEren eskumena izan behar duen ala AEK, IKA , EHU edo dena delakoarena baina bada garaia zer edo zertan tajuz hasteko.

Eta tontamentean gauza batez konturatu naiz. Gure sektore honetan geure behar izanak asetzeko eta jarduera garatzeko elkarlan gutxi egiten da. Hori guztia sarritan HABEren esku utzita daukagula dirudi. Gero HABEri kritika ere egiten diogu (askotan merezita), baina geuretik ez da gehiago irteten.

Sektore hau gainetik ikusita erakunde asko gaude: AEK, IKA, Udal euskaltegiak, sare pribatuak, baina ez dago batzeko modurik HABEren aginduetara ez bada.

Duela urte batzuk UEUren bidez jardunaldi batzuk antolatzen ziren, gaur egun ez daukagu horrelako ezer. Euskaltegi pribatu batzuek harremanak dauzkate HABErekin diru-kontuak negoziatzeari begira, baina hortik aurrera gutxi. Egia esanda, sasoi bateko malrrollito asko gainditu direla dirudi, baina bakoitzak bere astoari arre segitzen dugu.

Automobilen sektorean esate baterako ohikoa izaten da bizpahiru multinazioanal (lehiakide amorratuak sarritan) bat egitea motor berria garatzeko adibidez. Enpresa munduan Joint venture terminoa dabil bala-bala. Hitz hori elkarlanaren itzulpena izan daiteke gehiago barik.

Gurean, berriz, Big Brother-en pentsuan erreakzionatzen dugu. Ondo dago administrazioak ardura hartzea eta hori guztia, baina administrazio horrek ez du euskaldundu nahi dugun esparru guztia kubritzen bateko, eta sektorearen garapenean lehenengo interesatuak gu geu gara besteko.

Zer egina badago, ikerketa, garapena, hobekuntza,..zer euskaldundu asko, eta arinago eta hobeto euskalduntzea ere bai. Ez gara gutxi gainera.

Sentsazioa daukat hala ere Ford-ek eta Renault-ek baino deskofidantza handiagoarekin begiratzen diogula elkarri interes eta egitasmo komunak aztertzeko orduan. Eta ez dut uste Ford eta Renault baino lehiakideago garenik. Areago, lehiakide barik erronkakide hitza egokiagoa begitantzen zait guretzat.

Hizpide 61

Gaur heldu zait HABEk argitaratzen duen Hizpideren azkenengo alea, 61.a. Ez dut irakurtzeko astirik izan oraindik, gainetik ikusi baino ez. Lau artikulu datoz oraingoan:

• Corpus linguistikoa eta konkordantzien gaineko bat. Nati Abasolo eta M. Jose Lasherasek sinatuta. Azkenotan HABEtik konkordantziaren ingurukoak dabiltza zabaltzen, ikastaro pare bat ere egin da.
• Hiztegia ebaluatzeko tresna eta teknikak izeneko bat, Rosa Maria Jimenezek eginda. Titulua erakargarria da, irakurri beharko.
• Pello Esnalek puntuazioa lantzearen inguruko artikulua dakar oraingoan. Pello lehenago ere ibilita dago puntuazioa eta idazkera zaindua lantzeko materialak eta liburuak egiten. Lankide batek gomendatu digu gainera.
• Larry Vandergrift-en artikulu baten itzulpena: Ikusteko entzutea ala entzuten ikastea. Izenburu erakargarria hau ere, neuretzat eta besteren batentzat behintzat (gure erreguak entzun ote dituzte?). Hemendik hasiko naiz irakurtzen.

Aurreko baten ere galdera bera egin nuen. Hizpide irakurtzen da euskaltegietan? Haren gainean zerbait komentatu edo egiten duzue? Orduan ez nuen erantzunik jaso, hain gutxi irakurtzen da?

Irakurtzen duzuenok zelan baloratzen duzue? Nik neuk behintzat azkenengoetan gauza interesgarri pare bat topatu ditut. Gaur berton adibidez lankide batzuk ibili gara azkenengo argitatalpenetako baten gainean lantxo bat antolatzen.

Dena dela ez dakit zergatik urruneko sentsazioa ematen dizkit bertako artikulu askok. Hizkera ote? Maketazioa? Ez dakit, artikuluak idatzi baino blogeatzea nahiago dudan arrazoi berdina izango da?

Tira ba, edozelan ere artikuluon gainean zerbait komentatu nahi baduzue besterik ezean hemen daukazue plazatxu bat. Neu ere irakurri ahala saiatuko naiz berton zeozer plazaratzen. Ea ba! 

Egun bat

Ez dakit honen berri noraino ailegatu den. Karrajuaren bidez zabaltzen saiatu naiz behinik behin. AEKn ibilita AEK egunak urteko gehienak dira, ospakizun eguna bakarra, antolaketa lanek ospatzeko modua ematen badigute behintzat.

Karrajuan gora eta behera nabilenetik gutxitan aipatu dut lan egiten dudan erakundea. Politikoki zuzena izan edo neutralitate ikutua ematearren seguruenik. Eta, egia esanda, AEKri buruz berba egiten hasteko besteko neutralitatea eta bustitzeko gogoa falta zait.

Aukera ona izan liteke AEK Eguna AEK eta AEKideen goraipamen loratua egiteko. Halako une emozioanala probokatzeko eta berba handiak plazaratzeko. Jakina, ez da egokiera ona inondik ere AEKri egurra emateko, are gutxiago komunikazio arduradunarengandik bost metrora eta koordinatzaile nagusiaren gaineko pisuan lan eginda. Eta bateko nahiz besteko kontatzen jarriz gero ere, ez nuke jakingo ez nondik hasi, ez noiz amaitu.

AEKeguna Txorierriko herri batera ekarri eta bertako euskaltzaleen, erakundeen eta euskara elkarteen kolaborazioa inoizko handienetarikoa izan den honetan, AEKz berba egiteko Derioko Tximintx elkartekoek euren blogean artikulu paren baten kontatutakoa nahikoa eta sufiziente begitandu zait AEK zer den, zer ez den, zertan dabilen eta nondik datorren azaltzeko, neuk kontatu nezakeena baino gehiago. Hona artikuluok.

• AEK-k 30 urte Txorierrin - Txepetxa euskaltegiak 20 (2)
• Txepetxa AEK euskaltegia, 20 urte Txorierri berreuskalduntzen (1)

Ez dakit horrekin AEKri buruzko ideia egin duzuen. Bestela, zapatuan Larrabetzun ideia egiteko ez dakit, baina egun bat pasatzeko modua behintzat edukiko duzue. Nahi baduzue gainera [AEK] egunaren izenean AEK jartzen duen lekuan zuen euskaltegiaren izena ere jarri dezakezue, edo euskaltegiaren eguna beste barik (ikastolak, eskola publikoak eta horiek guztiek euren egunak ospatu eta geuk ez daukagu eskubiderik, ala?). Ni neu behintzat ez naiz haserretuko.

Eta Larrabetzura ez bazoazte, hemen daukazue AEK Egunerako prestatu den materiala, klaserako balio badizue txakolin batekin ospatuko dut zapatuan, eta badakit nork ordainduko didan gainera.

aek tagged map - Tagzania
AEK

Argaren bazterrak

Iruñerrian ibili gara gaur. I mintza-eguna. Kronika baterako apunteak (baten batek egin nahi badu edo).

Santutxu, goizeko 9.30ak: Briñas eskolaren aurreko bus geltokian. Mahatserriko berbalagun kuadrila, 120tik 30 inguru Iruñerako plananarekin. Ni, lo. Joño! Santxutxuko Joseba Basterra euskaltzale beteranoa han. Gorbeiako Karmeloko aterpearena Bertonen irakurri dudala eta kontua nondik nora dabilen galdetu, hura esplikatzen hasi, autobusa etorri, elkarren ondoan jezarri eta ia Iruñera arte Gorbeiako kontuak gora eta behera. Askok ez duzue ulertuko, baina balio sinboliko-emozional-nostalgiko handia dauka aterpe horrek Santutxutar askorentzat. Berri pozgarriak, aterpea konpontzeko asmoa daukatela, Mendi taldeak hartu duela,... (Honeek Bertonekoak albistea interneten eskegitzen dutenean link-a jarriko dut. Listo! HO betiko efizientea eta hemen dago albistea. Batzuek kontrakoa zabaldu nahi duten arren, Bertoneko langileak profesional-profesionalak)

11.30. Iruñea. Autobusetik jaitsi eta Gaztelu enparantzara. Josebarekin berbetan ez naiz konturatu ere egin autobusean nortzuk ibili diren. Orduan hasi naiz kargutzen: Santutxuko AEK-ko eta Asapalako lankideak eta nire berbalagunak, Uribe Kostako (Getxo eta Erandio) berbalagunak eta Udal euskaltegietako irakasle ezagunak. Kaixo, ezagutu bez! zeu be bai hamen, joño! Aurpegi ezagunak ere hasi dira agertzen: AEK-ko jendea, Topagunekoak,...

11.30 + ez dakit zenbat minutu. Cafe Iruña. Mahatsorrion koadrilatxu bat hasi bitartean zeozer hartzen joan gara. Eta zeozer hartu bitartean hasi egin da. Konturatu orduko berandu. Non dabiltza besteak? Iruñeko parte zaharrean bila sartu. Estafeta kalean kuadrila handia. Soinularia eta kantariak. Iruñea kantari esan digute. Denok han gaudelakoan entzun eta itxaron. Jendea bertokoak eta kanpokook osatutako koadrilari begira. Gustura. EAEkook Nafarroan euskaltasuna adierazten duen zerbaiten inguruan baten batek astakeriaren bat botako duen ustea dugula konturatu naiz. Nafarroatik datozenak hain beltzak etortzen zaizkigu ze,... Zapatu eguerdiko lasaitasuna, giriak kuriositatez begira, bertokoak kantuak eta kantakera gozatuz.... Hau ez da pintatu dugun infernua inondik ere.

13.00ak edo. Antolatzaileetako bat gure bila. Galduta zabiltzate, besteak aurretik dabiltza. Goazen ba aurrera! Nabarrerian gora, harresia,... eta Argako bazterra. Besteak aurretik dabiltza, eta erreka bazterretik aurrera segitu behar dugu "bermuta" ematen den lekuraino. Goazen. Ttipi-ttapa,...60 lagun inguruko koadrila, Bilbo inguruko autobusekoak gehienak, Argan gora. Esaten nian Julian, hemen ez gaozak danak!

Argako bazterra, txopoak, gurearen kontrako norabidean korrikalariak, Santiagorako erromesak, paseanteak,... gu, aurrerantza, paseoan, eguzkitatik, gerizpe gutxi. Paseokide ezezagunen berriketei adi,... ea nongoak-zer diren (euskaldun berriak, zaharrak, nafarrak, gipuzkoarrak, bizkaitarrak, 1b maila, 2 maila,...) Badakizue deformazio profesional eta diletante guztiak.

Andre bi, mintzalagun bikotea duda barik, naparrak, iruindarrak. Ibilbidearen ingurukoak deskribatzen, kontatzen, gogoratzen,.. haien ondoan nabil, entzuten,... hona txikitan etortzen ginen bainatzera, hemen "saldarriak" zeuden, hemengo baratzak! haiek piperrak eta tomateak!...han ez dakit zer klub,.. Aitu! Luxuzko gidariak topatu ditut! Entzun, esaten dutenari kasu egin eta begiratu, azkenean haiekin berbetan hasi,... eta Argako bazterrak gehiago ezagutu, eta Iruñea, eta iruindarrak...eta berbalagun berriekin paseoan,... Santutxukoak aurretik galduta daborduko. Eta eguzkitan, Argako bazterretik, txiri-txiri aurrera, andreoi entzuten eta berbetan,... A ze zortea eduki dudana 20 minutuan! Bidaiaririk porrokatuenak gura lukeena.

Halako baten, joño! Hemen dago koadrila guztia! Bermuta. Hurreratu eta ezagun gehiago. Ene! Zeu ere bai hemen? Zelaaaaan? Aitu hor nor dagoen! Urlia ez duzue ikusi? Hau da bermuta? Martinirik ez dago berriz! Birra bat, hartu pistaxoak,... Eguzkitan ondo gaude,.. Derrepentean, e! zugatik galdetzen dabil neska bat hemen,... Hori aurpegi hori, ezaguna... Nondik? Aibalaletxeeee! Usaia-Elena da bata! Kemajaaa! Gernikakoekin etorri da. Mini blog&beers-a eduki dugu salto baten. San Miguela eskuan eta... zelan zabiltza? Zelan bloga? EGA?....

Megafoniatik abisua,.. ez dut ostiripe ulertu baina aurrerantza doaz denak Argako bazterrean gora. 150 lagun omen. Eta denak berbetan,... Historiako mintzalagun simultaneo handiena izan behar da hau. Santutxuko berbalagunekin eta euren klasekideekin sinsorgadak esaten eta  gure berbalagun taldearen misterioa argitu guran goaz aurrera, eguzkitatik.

Burlatako etxeak ezkerrean. Ibilbidea zibiliziotik kanpo dabil. Ez tabernarik (ostras! tabakoa galdu dut!), ez komunik,.. Paz de Ziganda Ikastolara heldu gara akabuan. Ene! Elegantea ikastola! Barrura? Tabakoa erosi behar dut. Taberna topatzen noa, zurekin noa, gordeiguzue lekua... Non gaude? Atarrabian ala Burlatan? Aitu erretratoei, Indurain, Indurain, Indurain,... Non egongo gara ba? Atera beste buelta bat. Las Campanas, bai. Eguzkitan ondo e!

Mobila. Nun zaze? Kamiñoan gaoz, ontxe gaoz han. Tragua amaitu, joan, jezarri. Joño! Lasartekoak. Joño! Edorta, AEK-ko mintzapraktikarako arduradun nagusia. Zelan? Zer moduz? Aupa! Ardoa? Preguntau bez! Hiru platerrak jan. Erre daiteke? Ez. Kanpora. Zu nongoa zara? Autobusez etorri zarete? Hurrengoa Ordizian egingo dugu. Sua? Donostia bai. Donostia ez. Getxo bai, Getxo ez,...Barrura. Musika, kantuak,...Euskaldunok kantu alairik ez daukagu ala? Durungon bazkaldute dagoen lekuan,...dantzan, kadenetak, kantuak....

Kanpora berriro, jubilatu pare bat inguruan une baten: Joseba Basterra eta Joxemari Muxika. Han aititezebolleta bien batallitak. Eta gustura entzun gainera! "Izan zirelako gara (izan dira, dira, eta urte askoan izan daitezela!)..." etorri zait gogora. Josebak "hunkituta nago", Joxemarik "hona etorri beharra zegoen"... Enfin, une emozionala, Atxa patxaranak patrozinatuta.

Komunera noa. Oskar antolatzailea-arduraduna bidean. "Erantzun ona", gustura dabil mutila. Denak ere bai. Koordinatzaile batzuk (gure Oihana barne) berbetan eta dantzan. Barnetegietako eta euskaltegiko afarietako euforia ikutua antzeman dut. Irribarre jenerala.

Joateko ordua da bata! Kanpora, eguzkitan ondo. Autobusera. Bilborantza. Santutxu. Jaitsi. Zer? Pote batzuk? Nosajodido! Dozena bat lagun berbetan (edo dozena bat berbalagun?) txikiteoan,.... Santutxun zapatuko gau-giroan bultoa egiten, erretiratu gura baina ezin. Eguzkia aspaldian joan da.

Laburbiduz: Arga, gidari natiboak (besarkada bat biei, izena galdetzea ahaztu zitzaidan baina!), Usaia-Elena (musu bat neska, azkenean agur esan barik joan naiz), mintzalagun simultaneoa, beteranoak/ek hunkituta, eta aftersuna apuntapalan.

www.flickr.com

Technorati euskaltegi

Ikasleen blog pare baten berri eman dut aurreko post-ean. Orain arte ez dira ezagunak izan eta biak technorati-ren bidez topatu ditut. Technorati-n izena emanez gero aukera ematen dizu blogetan bilaketa pertsonalizatuak egiteko eta agertzen diren berriak jarraitzeko. Hiru bilaketa jarri ditut neure kontuan: euskaltegi, euskaltegia eta euskaltegiak. Izena emandakooi Technorati-k aukera ematen digu bilaketa hauek rss-ren bidez jarraitzeko eta zerbait berria agertzen denean, da! gure agregadorean agertzen da. Hiruretara harpidetu dut karrajua eta berton agertuko dira hiru hitz hauetariko bat aipatzen duten post-ak.

Bilaketetan kuxkuxeatzen hasi naiz, euskaltegi hitzarenean gehien bat. Eta aipu bitxiak aurkitu ditut blogetan euskaltegien inguruan, gaztelaniaz, eta ingelesez ere bai. Hemen ale batzuk:

Hemen ikasle batek maila gainditzeko azterketez zer pentsatzen duen.

...Esta misma mañana he tenido otro examen; sí, un sábado examen. Pero no era del instituto! sino del Euskaltegi. Estaba chupado! XD solo espero que el idazlan (redacción) no estuviera muy mal, que es lo que más miedo puede darme. Si apruebo esto y la segunda parte (ahozko/oral) me dan un título que no vale para nada jaja pero bueno, me devuelven parte de la matrícula del euskaltegi! (http://diokhan-ga.livejournal.com/662.html)

Ingeles hiztuna euskara ikasteko lehenengo pausoak ematen:

I don't get a chance to use that one too often, though I do like to randomly tell people Zakur beltza hil da 'The black dog has died' (and suffer their looking askance at me) just because I can. Time to learn a new model sentence that I can plug the different nouns I know into--but this time one that is a little more useful--until I can get my butt to an euskaltegi (language school) and do some proper learning. (http://wheylona.blogspot.com/2006/03/more-tiny-triumphs.html)

Hemen euskaltegian egin duena kontatzen duen bat:

Despues de hacer los ARIKETAS (ejercicios en euskera) de rigor, ha llegado el momento de la MINTZA PRAKTIKOA, o lo que es lo mismo la expresión oral. Y el tema del día agarrense a los asientos: EL AMOR PLATONICO....

Y luego claro me ha tocado a mi y hemos tenido que omitir ciertos detalles sobre mi manzana prohibida, esa que solo los más cercanos conoceis, si es que de verdad ya ni al Euskaltegi voy a poder ir a conservar mi intimidad. (http://spaces.msn.com/keydelvecio/Blog/cns!1pu0hCS5xk1SGQNr6CzwBcuw!939.entry)

Eta azkenik euskaltegian poz-pozik amaitu ez duen batena.

Para el día 15 estarán las notas definitivas, aunque apruebe definitivamente, no me apetece seguir en el euskaltegi, tienen un descontrol enorme con el sistema, los exámenes y todo eso. Si el año próximo hay plazas en la escuela de idiomas, me apuntaré, aunque todo el mundo me recomienda el euskaltegi porque se aprende más y antes. (http://damaramu.blogspot.com/2005/06/emaitzak.html)

Tira ba, ikasleak zer pentsatzen duen jakiteko era interesgarria izan daiteke blogetan murgiltze hau. Gehiago daude, badakizue technoratin sartu eta euskaltegi(a)(k) bilatu.

Itsaspepinoak, lehenengo ikasle-bloga?

Basauriko Udal Euskaltegia - ... Basauriko Udal Euskaltegia Euskara ikasi nahi baduzu, Basaurin aurki dezakezu leku on bat. Urbi auzoan dago, gartzelaren ondoan; beraz, ondo portatu!!Klasera piperra eginez gero, hara bidaliko zaituzte! Txantxaz aparte, hemen gustura egongo zara. Batzuetan, klaseak gogor samarrak izan daitezke, batez ere, trinko bat egiten ari zarenean. Hala ..

Itsaspepinoak [Technorati: euskaltegia bilaketa]

---

Technoratik txibatu dit, Basauriko Udal Euskaltegiko ikasle batzuek bloga montatu dute. Izena xelebrea: Itsaspepinoak.

Ez dakit izena nondik datorren baina egingo nuke euskaltegian hizkuntzarekin olgetan hasita sortzen diren halako berba-jokuetariko bat dela (egun baten bilketa egin beharko dugu).

"Euskaltegiblog" bat gehiago beraz, eta ez da azkena izango seguruenik. Honek berezitasuna dauka dena dela, ikasleek eurek sortu eta kudeatzen dutela dirudi. Ez dakit irakasleek hemen zer partizipazio eduki duten (interesgarria izango litzateke jakitea), edozelan ere hau da -nik dakidala- ikasleek eurek gidatzen duten lehenengo bloga.

Honela aurkeztu dute bloga:

Kaixo lagunok!!! Basauriko Udal Euskaltegiko lagun taldea gara. Luzaroan pentsatzen egon ostean, "Itsaspepinoak" izena ipintzea erabaki dugu. Zergatik sortu dugu bloga? Alde batetik, ikasleen arteko harremanak mantentzeko. Bestetik, euskara praktikatzeko aukera ona izango zela pentsatu dugulako. Gainera, hemen aurkitu ahal izango dituzu, besteak beste, gure esperientziak, gustoak, argazkiak, berriak, etab. Eta jakina, ZUK PARTE HAR DEZAKEZU!!

Blogaren edukian denerik, gai desberdinen inguruko iritziak, bertsoak, kantuak,... gauza gehiago sartuko dituztela ere esan dute. Puntu informala eta irekia dauka behinik behin.

Ikasleek zer kontatzen duten jarraitzea merezi du. Karrajuko agregadorean sartu dut jarioa. Uste duten baino irakasle gehiago edukiko dute begira. 

Hemen helbidea eta jarioa:

• http://www.blogak.com/itsaspepinoak.
• http://www.blogak.com/itsaspepinoak/feed.xml.