!name-ren blog-a

Karrajuak urtebete (II-asmoak)

Urtebetea joanda, atzera begira paratzeko tentazioan eduki liteke, beste baten igual. Orain nahiago dut Karrajurako zer egosten nabilen kontatzea.

Ez dira gauza asko, teknikoak gehien bat.

• Funnymonkey-ko jendeak eskola mundurako Drupalekin aurrekonfiguratutako bi instalazio eskaintzen ditu: ikastaldeentzako gunea eta blog gunea. Drupalek, zabaltzen ari diren beste sistemen aldean, malgutasuna du abantaila nagusi. Karrajua antolatzeko orduan horixe baloratu dut gehien bat, eta zerotik hasita aukera pila zabaltzen dituen arren, ez da Moodle edo Wordpress bezain erraza toreatzen hasteko. Horregatik Karrajuko instalazioa liberatu nahi dut, nola egin dudan erakusteko eta norbaitek Drupal ezagutzen hasi nahi badu zer miatu eduki dezan. Une honetan instalazioa edukietatik garbitzen nabil eta espero dut datorren astean zabaltzeko moduan edukitzea.
• Oraingo karraju hau drupal 4.6.6 bertsioarekin dago eginda. 4.7.x bertsioak hala ere itzelezko berrikuntzak ekarri ditu eta eguneratzeko desiatzen nago. Views eta CCK moduluek esate baterako malgutasun hori ikaragarri zabaldu dute. Zerbitzari aldaketa egin behar dut horretarako eta eduki eta modulu guztiak bertsio berrira ekarri, honekin apur baterako daukat oraindino.
• Karrajutik aparte lanerako eta esperimentazio hutsagatik hiru gune lantzen ibili naiz. Lankideen ekarpenak jasotzeko eta komentatzeko gune bat (hau oraintxe jarri dugu martxan intraneteko zerbitzarian), materialak sailkatzeko direktorio-podcast antzeko bat (hau ekainean ibili ginen probatzen). Hirugarrenez, Groups.Drupal-en ereduan inspiratuta, eta Elgg-en ideiara ere hurbildu nahian, komunitateentzako gunea atondu nahian ibili naiz. Oraindik alpha-alpha (horixe ba, alfalfa) fasean dago, baina kukutxua egin nahi badiozue hemen daukazue (gune esperimental totala da, ez ikaratu). Denbora apur bat hartzen dudanean hauek ere zabaltzeko asmoa daukat.

Tira ba, ikusten duzuenez Drupal honekin nabil jo ta ke, Moodle eta bestez ari gara asko azkenotan, ez dira txarrak haiek ere, ez,  baina baten batek umorea eta ausardia badauka, Drupal-en aukerak probatzera animatuko nuke, burua nekatzen ematen den denbora malgutasunak eta irekitasunak konpentsatzen dute soberan, engantxatu ere bai. Hori bai, tresna batekin edo bestearekin itsutu barik.

IFB - Irakasleen formaziorako bideo-saila: hamasei ale berri

IFB - Irakasleen formaziorako bideo-saila: hamasei ale berri - --

Egun gutxi barru egongo dira HABE Liburutegian IFB - Irakasleen formaziorako bideo-saila bildumako ale berriak. Hamasei DVDtan HABEk udan eratu zituen hitzaldiak bildu ditugu; eta baita La lengua oral coloquial y el aprendizaje de L₂ — Lagunarteko ahozko hizkuntza eta H₂ren ikaskuntza ikastaroaren baitan egin zirenak ere. Ikastaro hori Euskal Herriko Unibertsitateak eta HABEk eratu zuten Donostiako XXV. Uda Ikastaroen barruan. [Ikasbil: gogoan hartu]

Formazioan gabiltzanok badakigu zenbat kostatzen den gure arloko testuak irakurtzea eta irakurtaraztea. HABE aspaldian dabil antolatzen dituen ikastaro, jardunaldi eta abarretako pasarteak grabatzen, artxibatzen eta eskaintzen. Seguruenik horrela ez da hain latza egingo ekarpen interesgarriak jasotzea eta prozesatzea. Zabalteko era interesgarria da duda barik.

Ideia pare bat teknologiaren aurrerakuntza dela eta.

Bat. Bideo horiek sarean zabaltzeko modurik? Beharbada Youtube moduko sistemek ez dute oraindik kalitate-luzera handiko bideorik permititzen, baina deskargatzeko moduren bat? BitTorrent modukoa adibidez? Beti ere copyright eta lizentzia kontuak tartean ez badaude jakina.

Bi, formazioan gabiltzanok eta, orohar, edozein ekarpen egin dezakegunok zergatik ez dugu gehiago esploratzen ikusentzunezkoen bidea? Podcast-ak, screencast-ak, aurkezpenak, ... dirudien baino errazagoa delakoan nago.

Momentuko okurrentziak izan dira. 

Eguneraketa

powered by ODEO

Karrajuak urtebete (I estatistikak)

Orain konturatu naiz tontamentean urtebetea pasatu dela Blogger-en Karrajuko atea zabaldu nuenetik. Orain ez daukat balantzeetan eta ospakizunetan hasteko gogorik, baina kapituluka egingo dut zerbait datozen egunotan.

Momentuz, eta dena airean uztea modan ipintzen hasi dela, hemen ez daukagu Moodle ikastaro gehiagorik erakusteko, baina modari norberaren ikutua ematearren Karrajuaren estatistikak utziko ditugu bistan. Sikieran hasierako asmo haiek noraino heldu diren ikus dezazuen.

Statcounter zerbitzua erabiltzen hasi naiz duela hilabete ingurutik hona. Ez dakit norainoko fidagarritasuna daukan, baina entretenigarria behintzat bada, kuxkuxeroentzat gehien bat.

Hona hemen estatistikak.

Ainhoa Ezeizaren proposamena

Andonik Moodle-en inguruan publikatu duen artikuluak zorionak eta proposamenak ere ekarri ditu. Creative Commons-i esker artikulua sustatun ere argitaratu da, eta han erantzun dutenen artean Ainhoa Ezeiza dugu, proposamena-erronka-enbidoa dakarkigu. Hona hemen:

Eta mugimenduaz ari garelarik, han eta hemen erronka botatzen ari naizenez, noiz hartuko dugu formatzaileok informatikariek aspaldi hartu zuten bidea? Alegia, noiz hasiko gara edukiak elkarrekin sortu eta liberatzen? IKTeroak eta EHUkook lehenengo urratsak ematen ari gara EGA mailako ikastaro oso eta osatu bat diseinatzen hasteko, ondoren liberatzeko. Beste inor animatuko litzateke? Eta gauza bera egingo bagenu beste maila batzuetan? Animatuko zinatekete Moodle-en elkarrekin lan egin eta oinarrizko ikastaroak sortzera?

Erronka botata dago, guk jarriko dugu elkarlanerako Moodle instalazioa, zuk ideiak? ;-)

Tira ba, Moodle ikastaroa osatzeko esperientzia kolaboratiboa. Ez da makala. Ez dakit ba, euskaltegien mapa osatu ere ezin badugu, ikastaro oso bat.....

Gonbidatuak Karrajuan eta Moodle gehiago airean

Karrajua monoparentala izateari uzten hasi da. Moodle-en inguruan azkenotan piztu den interesa dela eta, Andoni lankideak ere Moodle-ekin izan duen esperientzia nonbait kontatu nahi eta hemen txokotxo bat uztea eskatu dit. Esan eta egin. Hemen daukazue Andonirena.

Karrajua.org hau hasieratik gabiltza esaten ez dela baten blog pertsonala, eta beste edonork lantzean behin zerbait plazaratu nahi badu hemen daukala lekua (beti ere guri dagozkigun gaien inguruan, noski). Horretarako bi aukera daude: foroak erabili (horretarako norberak egin dezake erregistroa), edo, gauzak maiztasun bateki publikatzeko asmoa badaukazu (ez du zertan egunerokoa izan) bloga erabili. Bloga erabiltzeko gurekin harremanetan jarri baino ez duzue egin behar.

Moodle gehiago agerian

Bestalde, Andoniren mezutik tiraka, albistea ere badaukagu. Duela gutxi Jakintza Ikastolako Maitek egin zuen bezala, AEK-k ere bere idazkuntza lantegia (Andonik haren gorabeherak kontatzen dituena) ere bisitariek ikusteko moduan utzi du. Hemen daukazue. Espioitza industrialak ez digu hainbesteko ikararik ematen nonbait.

Mapak

Atzo mintzalagunen mapa egiten hasi ginen. Baina Tagzania tresna interesgarria da gure intereseko kontuak lokalizatzeko eta mapetan banatzeko, erabiltzaileen arabera edo etiketen arabera. Nik neuk hiruzpalau biderrez erabili dut joan behar izan dudan tokiren bat aurkitzeko. Horrez gain, norberaren webgunean sartzeko aukera ere ematen dutenez, eta karrajuan testuak izeneko atalean dokumentuak sailkatzeko aukera daukagunez, pentsatu dugu Tagzaniaren laguntzaz gure intereseko mapen bilduma egitean (karrajuko atlas-a, ez da izen txarra).

Horrela bada, honako "liburua" antolatzen hasi gara:

• Euskaltegien mapak: Tagzanian euskaltegia etiketa erabili dutenak. Horren azpian AEKren mapa ere jarri dugu.
• Mintzalagunen mapak: Mintzalaguna etiketaren mapa. Azpitik Berbalagunak (berbalaguna etiketa erabili dutena, mendebaldekoak jeneralean) eta Mahatserriko berbalagunaren mapa (Asapala elkartekoak gure taldeak non batzen diren mapa sortzen ari dira).

Hauek dira momentuz daudenak, baina Tagzaniaren laguntzaz errazagoa da mapa berriak sortzea. Horretarako dena dela kolaborazioa behar da. Lehenengo eta behin atlas horretan zeintzuk mapa gehiago jarri daitezkeen ideiak botatzeko (mezu honen komentarioetan berton), eta bigarrena eta inportanteena, Tagzanian mapetan puntuak markatzeko eta etiketatzeko. Tagzanian, orain sortu diren beste hainbat ekimenetan bezalaxe (wikipedia, del.icio.us,..) kontua ez da batek dena egin eta guztiek jaso, guztion artean dakiguna plazan jarrita informazio eta ezagutza iturri potenteak eraikitzea baino. Euskaltegien eta euskalduntzearen atlas-a adibidez.

Harpidetzak e-postaz eta RSS gabeko webguneak

Feedwhip tresna deskubritu dut gaur, ondo etor daiteke gure intereseko webgune batzuk jarraitzeko, gehien bat  rss edo sindikazioa eman ez eta agregatzaileen bidez jarraitu ezin direnak. Ikasbil eta HABEren webguneak adibidez.

Zerbitzu honek zehaztutako webguneak lantzean behin arakatzen ditu eta aldaketa dagoenean bi aukera ematen ditu: rss jario baten bitartez jarraitztea edo e-posta mezua bidaltzea. Lehenengoa, esan bezala, ondo dator rss gabeko webgune batzuk jarraitzeko, bigarrenak, berriz, horretaz gainera rss daukaten beste batzuen berri e-postaz izateko modua ere ematen du. Karraju hau adibidez. Honela bada, ezkerreko zutabean link berria daukazue karrajuko aldaketetara harpidetzeko, beraz, baten batek bertoko mezuen berri e-postaz jaso nahi badu hemen dauka aukera.

Hala ere, zerbitzua probatzen nabil oraindik. Ez da erraza webgune baten aldaketen berri jario agregatzaile baten modura ematea. Aspaldi dauzkaten hemen instalatuta feed43-en bitartez egindako feed batzuk, eta horiek ere arazoak ematen dituzte: albiste berdina behin eta berriz jaso, .... Ea oraingo honekin.

Nik, dena dela, jario-agregatzailea erabiltzea gomendatuko nizueke: on-line (bloglines. Alesti,..), ordenagailuan instalatuta (GreatNews, Feed Reader,..), edo e-postan edo nabigatzailean sartuta (thunderbird, firefox,..). Egia esanda milaka tresna daude.

Sindikazioak ate berri ugari zabaltzen ditu informazioa gero eta eguneratutago eduki behar den sasoi honetan. Ni neu behintzat enamoratuta nago feedekin. Karrajuko agregatzailea duzue adibide. Bide batez, lehengo egunean batek galdetu zidan nondik ateratzen dudan astia berri horiek guztiak webgunean sartzeko. Azaltzen joan nintzen, baina sigla arraroak eta ingelesezko berba pare bat botata ihes egin zidan. Hurrengoan hobeto azalduko al dugu! Bitartean hemen daukazue euskarazko wikipediaren sarrera hasteko.

Era berean, sindikazioa ematen ez duten webguneei ere eskatuko nieke jarioa lehenbailehen atontzea, areago denon intereseko informazioa edo informazio ofiziala ematen dutenei. Ez dut ulertzen zelan duela gutxi eta software berriarekin sortutako webgune batzuek ez duten jarioa eskaintzen, gaur egun edukia maiztasunekin eguneratzen duen edozeinek (blogak, webguneak, albistegiak,...) aparteko ahaleginik gabe bere ikonotxoa daukanean. Habe.org eta Ikasbilengatik nabil, bai. Beste batzuek, berriz, euren jarioa errebisatu eta egokitu behar dutela uste dut, adibidez AEK eta Udal euskaltegiak (biek arazoak ematen dituzte agregatzaile batzuekin, ez daude ondo egituratuta antza denez).

 

Euskal Etxea Barcelona » Mintzalaguna Proiektua

Euskal Etxea Barcelona » Mintzalaguna Proiektua - [Berbalaguna del.icio.us]

Euskaldun zahar batekin Bartzelonan euskaraz hitz egin nahi al duzu? Animatu eta bidali orri hau Euskal Etxera!

Vols parlar euskara a Barcelona amb un nadiu? Anima’t i envia aquest full a l’Euskal Etxea!

Horrela dio Bartzelonako Euskal Etxeak antolatu duen mintzalagunaren publizitateak. Atzerriko euskaldunentzako euskalduntze eta praktika jarduerak ugaltzen ari dira.

Lehengo egunean sareko mintzalagunaren berri izan genuen, Brasilen bizi den batek gidatuta. Gaurkoan Kataluniako hau. Atzerriko euskal heritarrak (eta euskal herritarrak ez direnak) ez dabiltza makal, ez. Bartzelonako Euskal Etxearen aktibitatea bizi-bizia da behintzat, denean eta euskalduntzeari dagokionean ere bai. Haren bloga irakurri besterik ez dago.