drupal

Baliabideak sarean

Patxo Landa lagunarekin ibili naiz gaur arrastian teknoendredoen gainean platikatzen. Bere asmo eta proiektu batzuk kontatu dizkit, gaztelania-irakasle diharduten hiru lagunen artean martxan ipini berri duten Tres Tizas gehien bat.

Oso proiektu interesgarria, hizkuntzaren irakaskuntzaren hiru arlo berezitan: HIPIn (Hizkuntza indartzeko programak eta ikasgelak), LHIn ( lanbide hastepenetarko ikastegiak) eta DBHn, hizkuntz-klaserako aktbitate errazak batu eta zabaltzea dute asmoa. Web2.0 tresnekin bloga eta wikia atondu dituzte horretarako. Wikian eskuragarri dauden aktibitateak zehatz azalduta eta baliabideekin ondo hornituta aurkeztu dizkigute. Guztion eskura dauden bitartekoekin eta -bereziki- gogo eta ilusioarekin gauza politak egitea ez da zaila, ez.

Tres Tizas hau ez da izan aste honetan ikasmaterialak eta aktibitateak sareratzeko aurkitu dudan adibide bakarra gainera. Egun batzuk lehenago Anibal de la Torre irakasle-blogari ezagunak sarean baliabideak konpartitzeko gune berria (berreskuratua hobeto esanda) aurkeztu zigun: Recursos Educativos en Red. Lehengo esperientzia bat berreskuratu eta Drupal softwarearekin (Karrajuan erabiltzen duguna), sarean dauden baliabide edukatiboen direktorio kolaboratiboa egin du, kategoria eta etiketekin sailkatua, eta baloratzeko puntuazio sistema batekin hornitua. Del.icio.us eta Zabaldu.com-en arteko zerbait. 600 baliabide baino gehiago ei dauzka karteran, eta gainera norberak aurkitzen duena bidaltzeko aukera ere ematen du.

Bestalde, OpenAcademic-en klaserako sortzen diren ideiak eta ikasgaiak eta berauek zabaltzeko eta antolatzeko bideen inguruko gogoeta egin dute, Thoughts on Sharing Lessons artikuluan. Beharrak eta interesak aztertuta, tresna hau proposatu dute. Funtsean sarean produzitzen diren "lekzioak" jasotzen dituen agregatzailea da, jaso ahala iturriaren arabera sailkatu eta aurkezten dituena. Ideia ona, eta ezaguna ere egiten zait. Tresna osatuago baten lehenengo pausoa izango litzateke hau, ikasmaterialak partekatzeko eta eskatzeko zerbitzuak ere beharko lirateke OpenAcademic-ekoen arabera.

Azken gune hau ere Drupal-ekin eginda dago, eta duela hilabete batzuk ikasmaterialak sareratu eta partekatzeko FreeTeach.com gunea gogoratu dut, Drupalekin eginda hura ere.

Tira ba, lehen esan dudan bezala, badira klasean zer egingo ote dut galderatxo horri erantzuten laguntzeko modu errazak, teknologiaren aldetik behintzat.

Blogetik "liburura"

Blogetan gauza asko botatzen dira, hurrenkera kronologikoan, eta halaxe agertzen dira jeneralean, berrienetik hasita atzerantz. Batzuetan berriz, etiketak, kategoriak eta guzti, kostatzen da aspaldian botatako artikuluak aurkitzea. Nik neuk ere, Karrajuan berton artikulu zahar baten bila nabilenean buelta bat baino gehiago eman behar izaten ditut. Azkenean Google-era jotzea izaten da efektiboena.

Blogetan era askotako mezuak idazten dira, batzuk oso lotuta daude sasoian-saoiko kontuekin, eta publikatzen diren momentutik aurrera balioa galtzen dute. Beste batzuk, berriz, intenporalagoak dira, dela gaiagatik, dela inguruan sortu den hausnarketa kolektiboagatik (ez zait eztabaida terminoa gustatzen), eta lantzean behin osteratxoa egiteko modukoak izaten dira.

Azken baten, bloga idaztea liburua idaztea bezalakoa izan daiteke, baina orden kronologikoa ez da logikoena izaten beti. Karrajuan ere badira beste era batera sailkatu ahal diren artikuluak (aparteko merezimendurik ez badaukate ere), eta Drupal-ek aukera ona ematen du "liburu" modura sailkatzeko, book modulua.

Fijatu bazarete Karrajuan hasieratik daukagu atal bat testuak izenekoa. Hasiera baten asmoa gai zehatz bati buruz idazten diren testuak eta artikuluak (blogetik kanpo) berton batzea zen, eta halaxe sortu ziren batzuk (zirriborroak gehienetan). Book moduluak aukera hori ematen du, wiki baten antzeratsu. Eskuliburuak eta how-to-ak idazteko pentsatuta zegoen, baina edozelako testuak antolatzeko balio du.

Horrez gain, beste aukera bat ere badago, beste era bateko edukiak (bloga, orri estatikoak edo norberak sortutako eduki-motak) "liburu" batean antolatu daitezke, orri nagusiak eta menpekoak kategorietan eta ataletan antolatuta.

Horrela, blogeko mezu batzuk antolatzen hasi naiz. Adibidez M-learning-i buruzko azken mezua teleikaskuntza izeneko liburuan sartu dut, edo egiten ditugun esperimentu tekniko batzuk teknoendredoak liburuan kokatu ditut, edo Hizpide bat agertzen denean egiten ditugun komentarioak Testuak eta liburuak izeneko liburuko azpiatal baten daude. Gainera liburu guztiak daukate inprimatzeko bertsioa (adibidea) non liburu osoa (artikulu guztiak) inprimatu daitezkeen.

Mezuek blogean jarraitzen dute, eta, aldi berean, liburua osatzen dute. Blogeatzen duguna antolatzeko beste era bat. Kolaboratiboa gainera.

Drupaled, instalazioa eskuragarri

Funnymonkeyko jendeak DrupalEd instalazio berezia atondu dute hezkuntza munduari begira. Aspaldian dabiltza Funnymoneykoak Drupal CMS (karrajuan erabiltzen dugun berbera) hezkuntza mundura egokitu nahian, eta lehenngo fruitua datorrela dirudi.Hemen daukazue iragarkia.

Funtsean Drupaled-en egin dutena da Drupal hezkuntzaren inguruko "site" edo webgunea antolatzeko atondu, horretarako erabili daitezkeen moduluak eta konfigurazioa emanez. Honako aukerak ematen ditu instalazio honek:

• Lanerako gune pertsonala
• Talde-lanerako gunea
• Erabiltzaileek eurek lan-taldeak sortzeko aukera.
• Ikastalde edo klase baterako guneak sortzeko aukera.
• Podcast plataforma
• WYSIWYG testu editorea
• wiki funtzionalitea
• blog pertsonalak eta klasekoak.
• RSS jarioak: gune osoarena, ikastaro bakoitzarena, kategoriak eta etiketenak, eta erabiltzaileenak.
• Norberaren irudi-galeriak
• Norberaren artxibategiak edo errepositoriak
• Talde itxiak (gonbidapenaren bidezkoak) sortzeko aukera.
• Markadore soziala, laster-marketan bilatzeko aukerarekin.
• Spamaren kontrako babesa
• Ikastaroko egutegiak;
• Gune osorako egutegia;
• Erabiltzaileen profil edo deskribapen moldagarria. Etiketekin hornituta, gustuen edo lanen arabera bilatzeko adibidez.
• Guneko erabiltzaileen artean lagun zerrendak sortzeko aukera;
• the ability to find the missing sock in the dryer, hau da, lehorgailuan galtzerdi galdua aurkitzeko aukera (??? Badakit honek beste zerbait esan nahi duela baina ez dut esanahia, edo txistea, hartzen)

Ikaskuntza sozialerako ingurunea sortu nahi izan ei dute honekin, ikuspegi tradizionalago baterako ere balio badu ere.

Karrajurako Drupal aukeratu nuenean,Wordpress bezalako blog plataformetatik harago, aukera eta malgutasun gehiago eskaintzen dituen CMSaren bila nenbilen, hainbaten artean Drupal izan da, nire ustez, aukerak eta malgutasuna ez ezik, hezkuntza eta irakaskuntza mundurako hurbilpen interesgarrienak zituena, Moodle bezalako LMSen funtzionalitate zehatzera heldu barik aldi berean. DrupalEd hau horren adierazgarria izan daiteke.

Lokalean instalatu dut, eta probatzen nabil, alde batetik Elgg-en eredua gogoratzen dit gauza batzuetan, beste batzuetan Moodle-en funtzionalite batzuk ere badauzka. Edonola ere, Funnymonkeykoak bi plataforma horiekiko integrazioa ere lantzen dabiltza. Ikasleekiko harreman formal eta informaletarako tresna interesgarriaren itxura dauka, segituko dugu aztertzen.

Sarean ez dut erakusteko probalekurik topatu, nahi baduzue zerbitzarian proba bat instalatuko dut ikus dezazuen. Bestela jaitsi eta lokalean probatzeko aukera ere baduzue.

Estekak:

• DrupalEd
• Funnymonkey
• Funnymonkey-ren artikulua DrupalEd-i buruz.
• DrupalEd-en ingurko taldea Groups.Drupalen
• DrupalEd instalazioa, jaisteko.

Drupal modulua, Service links: Bildu.net eta Zabaldu.com

Karrajuko mezuak deli.cio.us, bildu.net eta zabaldu.com-era zuzenean bidaltzeko aukera jarri dugu. Mezu bakoitzaren amaieran ikusiko dituzue ikonotxoak eta estekak.

Drupalen Service Links modulua erabili dugu horretarako, baina Drupal komunitatean euskarazko zerbitzuok (oraindik) oso ezagunak ez direnez, kodearen lerrotxo pare bat aldatuta bildu.neten markatzeko edo zabaldu.comera bidaltzeko aukerak gehitu ditugu. Oso erraza da egia esanda, ez da programatzailea izan behar (hemen ez daukagu halakorik).

Baten bat Drupalekin badabil eta modulua erabili nahi badu, hemen behean dauka 4.7. bertsiorako egokitzapena.

Eguneraketa eta look berria

Karrajua.org-en instalazioa eguneratu dugu Drupal 4.6 bertsiotik 4.7ra. Bide batez, eta lehengoaren diseinua ere bertsio berriarekin ibiltzeko eguneratu behar zela, diseinu berria ematea erabaki dugu. SEO Position eta Refresh diseinuen popurria egin dugu itxura berria emateko, norberaren ikutu batzuekin.

Honelako eguneraketa egitean beti geratzen da zerbait ondo-ondo eguneratu edo egokitu gabe, erroreak,... Proba batzuk egin ditugu eta gehiena ondo dabilela dirudi, detaile pare bat konpondu behar dira beste barik. Ibilian-ibilian hala ere, baliteke erreparatu ez diogun zerbaitez konturatzea. Eskertuko genuke jakinaraztea.

Bestalde, 4.7. ez da Drupalen azkenengo bertsioa, Drupal 5 berriagoa ere badago. Asmoa daukagu eguneraketa 5. bertsio horretara eramateko, baina euskarazko itzulpenarekin arazo batzuk daudela dirudi eta apur bat itxaron beharko dugu.

Bertsio-berritze honekin gainera, aukera berriak ere baditugu. Aurrerantzean joango gara probatzen. Ez ahaztu karrajua.org hau gune esperimentala dela gehien bat.

Karrajuak urtebete (IV-instalazioa)

Duela bi aste agindu nuen modura, karrajuaren tripak erakutsiko ditut. Karrajua.org-eko instalazioa hartu, garbitu eta norberak ordenadorean instalatzeko moduan prestatu dut.. Zerbitzariaren banda-zabaleraren murrizketa ez gainditzearren box.net-n ipini dut. Hemen daukazue jaisteko fitxategia:

Karrajuak urtebete (II-asmoak)

Urtebetea joanda, atzera begira paratzeko tentazioan eduki liteke, beste baten igual. Orain nahiago dut Karrajurako zer egosten nabilen kontatzea.

Ez dira gauza asko, teknikoak gehien bat.

• Funnymonkey-ko jendeak eskola mundurako Drupalekin aurrekonfiguratutako bi instalazio eskaintzen ditu: ikastaldeentzako gunea eta blog gunea. Drupalek, zabaltzen ari diren beste sistemen aldean, malgutasuna du abantaila nagusi. Karrajua antolatzeko orduan horixe baloratu dut gehien bat, eta zerotik hasita aukera pila zabaltzen dituen arren, ez da Moodle edo Wordpress bezain erraza toreatzen hasteko. Horregatik Karrajuko instalazioa liberatu nahi dut, nola egin dudan erakusteko eta norbaitek Drupal ezagutzen hasi nahi badu zer miatu eduki dezan. Une honetan instalazioa edukietatik garbitzen nabil eta espero dut datorren astean zabaltzeko moduan edukitzea.
• Oraingo karraju hau drupal 4.6.6 bertsioarekin dago eginda. 4.7.x bertsioak hala ere itzelezko berrikuntzak ekarri ditu eta eguneratzeko desiatzen nago. Views eta CCK moduluek esate baterako malgutasun hori ikaragarri zabaldu dute. Zerbitzari aldaketa egin behar dut horretarako eta eduki eta modulu guztiak bertsio berrira ekarri, honekin apur baterako daukat oraindino.
• Karrajutik aparte lanerako eta esperimentazio hutsagatik hiru gune lantzen ibili naiz. Lankideen ekarpenak jasotzeko eta komentatzeko gune bat (hau oraintxe jarri dugu martxan intraneteko zerbitzarian), materialak sailkatzeko direktorio-podcast antzeko bat (hau ekainean ibili ginen probatzen). Hirugarrenez, Groups.Drupal-en ereduan inspiratuta, eta Elgg-en ideiara ere hurbildu nahian, komunitateentzako gunea atondu nahian ibili naiz. Oraindik alpha-alpha (horixe ba, alfalfa) fasean dago, baina kukutxua egin nahi badiozue hemen daukazue (gune esperimental totala da, ez ikaratu). Denbora apur bat hartzen dudanean hauek ere zabaltzeko asmoa daukat.

Tira ba, ikusten duzuenez Drupal honekin nabil jo ta ke, Moodle eta bestez ari gara asko azkenotan, ez dira txarrak haiek ere, ez,  baina baten batek umorea eta ausardia badauka, Drupal-en aukerak probatzera animatuko nuke, burua nekatzen ematen den denbora malgutasunak eta irekitasunak konpentsatzen dute soberan, engantxatu ere bai. Hori bai, tresna batekin edo bestearekin itsutu barik.