ikasleak

zergatik azterketa bat gainditu behar dut euskalduna naizela baieztatzeko?

zergatik azterketa bat gainditu behar dut euskalduna naizela baieztatzeko? - Euskalduna jaio nintzen, euskaraz hitz egiten dut,hala ere, lan egiteko orduan ez naiz euskalduna EGA ala Administrazioaren hirugarren hizkuntz eskakisuneko azterketa gainditu ez dadalako. Beste aldetik oraindik ez dut inoiz egin erderazko azterketarik, baina hori bai, ez dut arazorik erdedaluna naizela baieztatzeko, Beraz ez dit inork inoiz eskatu erderazko ziurtagiria. Orduan zer? Eusko jaularitza ez dago burutik sano ala? Horrela izanik, gero eta nazkagarri egiten zait euskara ikastea. [Galdetu.com]

Galdera hau bota du lagun batek galdetu.com zerbitzuan. Eztabaidatxoa ere piztu da. Zeuen iritzia eman nahi baduzue sakatu hemen.

885.000 euro 2006an maila egiaztatu duten ikasleentzat

885.000 euro 2006an maila egiaztatu duten ikasleentzat - [Ikasbil: gogoan hartu]

Gaur zabaldu da informazio hau:

2006an HABEren mailak egiaztatzeagatiko dirulaguntza prozesua amaitu da dagoeneko. Maila egiaztatu zuten 3.476 ikaslek zuten dirulaguntza eskatzeko aukera. Horietatik 2.083 ikaslek egin dute dirulaguntza jasotzeko eskaera (%60), eta guztien artean 885.000 banatu ditu HABEk.

Galdera inozoak igual, baina, aukera eduki eta eskatu ez duten 1.393 horiek zergatik ez ote dute eskatu? Gutxiago tokatuko zen orduan, ala gehiago gastatuko zen?

Miranda de Ebron euskarak baditu 138 ikasle [Onintza Irureta]

Miranda de Ebron euskarak baditu 138 ikasle [Onintza Irureta] - Miranda de Ebroko Hizkuntza Eskola Ofizialean duela bi urte hasi ziren euskara irakasten. Espainiako Eskolen artean, euskara ikasle kopuru handienetakoa duena da Burgosko (Gaztela eta Leon) herri hau: 138. Alvaro Ravelli bertako irakasleak esan duen moduan, «Araban arrakastatsu dabilelako hurbildu da euskara Ebrora». [Argia astekaria]

Aste honetako ARGIAn Miranda de Ebroko hizkuntz eskolako euskara ikasten dabilen talde baten gaineko erreportajea daukagu, Onintza Iruretak eginda. 

Euskal Herriaren auzo herrietan ere jendea ibiltzen izan da euskara ikasten, Castro-Urdialesen euskaltegia egon ei zen sasoi baten eta Logroñon ere zerbait dagoela daukat entzunda. Ipar aldetik ere duela gutxi eduki genuean Tolosaren berri. Ikasle hauek ez dira Argentina edo Poloniakoak bezain exotikoak, baina interesgarria erreportajea.

Gutxitan ikusi dut euskara ikasten dabilen jendearen gaineko hain erreportaje zehatzik, taldekide bakoitzaren interesak eta asmoak kontatzen dituena. Miranda baten euskara ikasten nor-zergatik dabilen, EAEko lan kontuak nagusi izango direla pentsa daiteke. Halakoak aipatu dira erreportajean, baina bestelakoak ere bai. Ez dut nabaritu euskararekiko halako jarrera ultrapraktikorik oro har, euskaltzaletasun sutsurik gabe ere jarrera positiboa igarri dut, tentsio eta kontzientzia kargu bakoa. Taldean giro ona dagoela dirudi.

Tira ba, Mirandako talde hori ez zait iruditu euskal-lurraldean diharduten talde askotatik oso desberdina. Irakasle modura, inbidia apurtxo bat ere eman didate hango irakasleek. Erreportajea irakurtzea gomendatzen dizuet.

Euskara ikasleak Argentinan milara iristear

Euskara ikasleak Argentinan milara iristear - HABEk eta FEVAk (Argentinako Euskal Erakundeen Federazioa) urteroko hitzarmena sinatu berri dute, Argentinako 40tik gora euskal etxeetan euskarazko eskolak sustatzen jarraitzeko. Ia mila heldu ari da uneotan Argentinako euskal etxeetan euskara ikasten. [Erabili.com berriak]

Euskal Etxeen inguruan ikasle-mogimendu handia dabil azkenotan. Argentinan mila lagun euskara ikasten ez da gutxi. Kanpoan gero eta gehiago, etxean gero eta gutxiago? 

Berton

Bertoko (gure auzoko) kontu pare bat Berton aldizkariak ekarrita. Berton herri-aldizkaria edo orain esaten den modura tokiko hedabidea dugu. Duela 9 urte bertoko euskaltzale batzuek sortu genuen eta bere ibilbidetxoa egin du hilean-hilean inguruko gauzak ekartzen.

Bertoko diogunean azalpena eman behar izaten dugu sarri, Bilboko auzo batzuetako aldizkaria da, antxinako Begoña errepublika osatzen zutenak (Begoña, Santutxu, Uribarri, Otxarkoaga,...).

Tira ba, lehengo astean 94. zenbakia irten zen eta gure mundu honekin lotutako artikulu pare bat topatu ditut.

Euskara ikasteko ez dago adinik

Bateko, Santutxun euskara ikasten dabiltzan adinekoen talde baten gaineko erreportajea egin dute. Interesarekin irakurri dut. Lanean azkenotan inoiz komentatu dugu euskara ikasteko interesa agertzen hasi dela adineko jendearen artean. Gainez egin barik ere, taldeak sortu dira han eta hemen. Eta jeneralean horietan dabiltzan irakasleak pozik ibiltzen dira. Jarrera ona, erritmo lasaia, ikasleek presio gutxi eta giro ona aipatzen da. Adineko jendeak berak eskatuta eratu dira taldeak sarritan.

Erreportajetik azken hau gustatu zait gehien bat:

Euren burua ikasturte honen bukaeran imajinatu ezkero denen itxaropenak antzekoak dira “orain baino gehiago ulertu eta zerbait hitz egitera animatzea” eta hori arinago lortzeko Bienvenidok eskaintza bat luzatzen die euskara ikasten dauden aitite-amamen iloba guztiei: “Gurekin euskaraz egin dezatela, guk ordainean paga igoko diegula, kar, kar, kar.” Eta, batek daki, horrela ere, agian uste baino lehenago, Balbinak Busturiko bere lagunekin kartetan euskaraz egingo du, eta José bere herria den Herrera de Pisuergan, berak esan bezala, klasetxoren bat emateko gai izango da, eta Felisa, Gotzone, Argia, Bienve eta gainontzekoak klasetik irten eta ilobekin euskaraz komunikatzeko gai izango dira.

Neska-mutikoak, badakizue, aitita-amamekin euskaraz, ezpabere paga barik. Beharbada HHEEkin erresuminduta dabiltzan irakasle askori honelako talde batekin terapiatxoa egitea ondo etorriko litzaieke.

Peskizaren jarraipena

Duela aste batzuk Bertonen berton agertu zen beste artikulu bat dela eta, euzkeldunbarriaren peskizan hasi nintzen, terminoa non-noiz hasi zen erabiltzen, eta gehien bat helduen euskalduntzearen fenomenoaren gainean jakinmina asetu guran.

Oraingoan, bigarren orrialdean 1915ean Santutxuko Karmelo elizan egindako argazkia paratu dute. Juventud Vascaren ospakizun batena. Eta testuan informazio interesgarria topatu dut:

Sortu eta urte gitxitara, Bilboko Juventud Vasca (EAJko gaztediak, gaur egungo EGIren aurrekoak) euskara eskolak emoten hasi zan. 1915ean ikasle moltzo handia batu eben Karmelon Alfredo Etxaberen ‘Matilde’ antzezlanean parte hartzeko...

Beraz, 1915erako euskara eskolak nahiko errotuta zeuden Bilbon. Egia da argazkian agertzen zirenak umeak direla gehien bat, baina euskalduntzearen bidea abiatuta zegoen seinalea. Helduekin ere bazebiltzan? Iturri bat eman digute artikuluan, Juventud y nacionalismo vasco liburua, hortik tiratu daiteke beharbada. Momentuz, euskalduntzea abertzaletasunaren suspertzearekin batera hasi zela dirudi. Hortxe hasiko zen taiutzen 1930 inguruan lehenengo agerraldi literarioak dituen "euskaldun berri" hitzak seguruenik.

Kontu sinbolikoa amaitzeko. XX mendearen hasierako urteetan, antza denez, Karmelo eliza bazen euskaltzaletasunaren erreferentea Bilbon. Berton ikastola, gau-eskola eta euskaltegia ezagutu dugu askok gerora. Euskal Herrian horrelako lekuak gehiago dira, euskararen "tenpluak" edo. Gurean horretarako galduta daukagu.

2006ko ikasleentzako dirulaguntzak

Gaur berbalagunetako bat ibili da honekin arduratuta, Ikasbil-en begiratu eta albiste hau agertu da:

2006ko ikasleentzako dirulaguntzak

Abenduaren 20ko dataz erabaki dira 2006ko ikasleentzako dirulaguntzak, baita bakoitzak ikusteko moduan jarri ere HABEren web orrian

HABEren ikasleentzako dirulaguntzak izeneko programan sartuta, ikaslearen sarbidea erabiliz, NANa eta pasahitza sartuta, sortzen zaizkion 3 aukeretako bigarrena aukeratuta (Dirulaguntzaren emaitza ikusi), eskaeraren emaitza ikusi ahal izango du ikasleak.

Ebazpena bera, berriz, ostiral aldera argitara emango da orri horretan bertan eta HABEren ordezkaritzetan.

Bide batez, HABEtik egunotan etorri diren beste albiste pare bat:

• Txiste eta denbora-pasa gehiago Ikasbilen
• HABEren egoitza aldaketa Bilbon: Zabalburutik Gran Viara joan da. Eusko Jaurlaritzaren egoitza nagusira.

Eskaera Tolosatik

Harremanetarako formularioaren bidez eskaria heldu zaigu Okzitaniako Tolosatik. Zabaltzea eskatu digute eta hemen daukazue:

Kaixo,

Toulouse Frantzian, euskera ikasten ari garen Iparraldeko zein Hegoaldeko zenbait lagun gara eta lehen egiten zen modura, elkarri euskeraz eskutitz edo mailak bidaltzeko hegoaldeko lagunen bila gabiltza, interesaturik egonez gero, erantzun perabasolo[abildua]hotmail[puntua]com mail helbidera.

Eskerrik asko eta Zorionak,

Per

Toulouse map - Tagzania

Badakizue, praktika epistolarra (paperezkoa zein digitala) egiteko aukera ona. Beharbada mintzalagunen inguruan dabilen jendeari interesatuko zaio bereziki, edo idazten ohitura hartu nahi dutenei, edo Garona Garai eskualde horretan zer dabilen jakinmina daukanari, edo... Animoa bada!

Ez dakit honelako ekimenek zer arrakasta izaten duten, sare sozialak etorri zaizkit gogora. Horrelako zerbaitek funtzionatuko ote luke?

Hizkuntza gatazkak kudeatzen ikasi

Hizkuntza gatazkak kudeatzen ikasi - Pasa den astean autoari gurpilak aldatzera joan eta horixe egin nahi nuela mekanikoari esan nioenean, irribarre burlaize batekin erantzun zidan, berari gaztelaniaz egiteko esanaz. [Erabili.com: iritizi muinetik]

Iñaki Arruti euskara teknikariak askotan erreparatzen ez diogun kontua ekarri digu gaur erabili.com-en, hizkuntz-gatazkak pertsona artera ekartzen dituen gatazkak. Eguneroko hartu-emanetan euskaraz jardun nahian topatzen ditugun jarrerak, egoerak eta oztopoak ditu gai nagusi.

Hizkuntza ikastearen ingurumarian ere ez dut uste ondoezak, tira-birak eta (barne) gatazketatik libre gaudenik. Norbaitek espero eta besteak nahi duena, baten konbentzimenduak eta bestearen usteak, halakoak esaten duena eta besteak egiten duena, nahi genukeena eta daukaguna... Hizkuntz-pedagogiarekin batera hizkuntz-psikologia horri kukutxu bat egitea ez litzateke kalterako izango. Ikastea bera ez da hizkuntz-gatazka azken baten?