berbalaguna

Mintzalagunen inguruko ikerketa

Tximintx euskara elkartekoek euren blogean iragarri dute:

Derioko Berbalagunaren gaineko azterketa egin dute

Natalia Lopez deustuarrak Derio eta Getxoko berbalagunen gaineko azterketa egin du Hiznet ikasketarako.....

Hemen lan horretatik ateratako aipu batzuk:

..egitasmoa egiteko BERBALAGUN egitasmo desberdinak aztertzea, eta zeintzuk diren haien arteko desberdintasunak helburu nagusia izan da.

Jendea, bai Getxokoak, eta bai Deriokoak gustura dago jasotzen dutenarekin, eta beharrezko ikusten dute horrelako egitasmoak martxan egotea.

Denboraren poderioz ikusten dira aldaketak. Deriok agian jarraituko du Getxok egindako ibilbidea, taldeak osatzerakoan, adibidez, baina, garrantzitsuena da jendea kalera ateratzea, eta euskaldun berri eta euskaldun zaharren arteko topaketak, denon artean konturatzeko euskaraz hitz egiteko harremanak mantendu behar direla

Artikuluaren helbidea: http://www.blogari.net/tximintx/2006/12/13/derioko_berbalagunaren_gaineko_azterketa

Ez dut artikulua ikusi Hiznet-en zerrendan oraindino.

Asko zabaldu dira honako ekimenok azkenotan, beharbada sasoia izan da haien gaineko azterketak agertzeko. Euren balioa, emaitzak eta etorkizuna ebaluatzeko, dena pertzepzio eta susmo mailan baino ez geratzeko.

Ni berbalaguntzera noa orain. Ez dut azterketarik egingo, zin dagizuet. 

Blogak eta beste

Technorati-k segitzen du funtzionatzen eta blog berrien berri eman digu. Honakoak agertu dira azkenotan:

Euskaltegiko blogak

• bogabloga blog: Beasaingo Udal Euskaltegiko autoikaskuntza ikasleen bloga
• guzubiarten blog: Iruñeko Zubiarte euskaltegiko ikasle batzuendako bloga

Mintzalagunak:

• Aiaraldeko berbalagunak: Arabako eskualde honetako berbalaguna
• Enkarterriko berbalagunak: Bizkaiko mendebaldeko herrietatik

ELE

Blog interesgarriak deskubritu ditut azkenotan gaztelaniaz ELE (Enseñanza de español como Lengua Extranjera. Euskaraz zelan eman: Atzerriko Hizkuntzen Irakaskuntza-AHI?) deritzonaren inguruan. Komunitate interesgarria dabil blogosferan. Ale pare bat utziko ditut hemen, gehiago dira hala ere, euren link-ei jarraitu baino ez duzue egin behar horiek deskubritzeko:

• Enseñando español
• De estranjis

Beldurrak kentzen

Tandem fundazioko Jürgen Wolf eduki genuen hizlari atzo Santutxun. Berbalagunak antolatuta Euskaraz hitz egiteko beldurra nola galdu lelo erakargarria zeukan hitzaldiak, berbalagun eta euskaltegian ikasle dabiltzanentzat gehien bat.

Neuri ere interesatzen zitzaidan kontua. Tandem-i buruz zerbait entzun dut inoiz. Hizkuntz elkartrukeak antolatzen dituztela, hainbat herritan zabalduta daudela, mintzalagunen inspiratzaileak direla,... Hala ere, ez da bigarren hizkuntzaren ikaskuntzaren munduan sarri entzuten den izena, eta zerbait desberdina aurkitzearren edo.

Eta zerbait desberdina bai..., eta ez.

Gure Txokoa, mintzalagunen bloga

Karrajua klonatzeko prozesuan nabilela, Mahats Orriak auzoko komunitatean blog berrien artean gauza bitxia deskubritu dut. Berbalagun talde baten bloga: Gure txokoa. Hasi berria, baina lehenengo mezuan aurkezpena eta asmoak azaltzearekin batera urtegia inauguratuta utzi digute.

Mahatserriko berbalagunan partaide nabil neu ere, eta behin baino gehiagotan kontatu ditut hangoak. Euskaltegiblogak bataiatu ditugunak ere gero eta gehiago dira, baina, nik dakidala (erratuta banago, esan), hau mintzalagunen blog modura (mintzalagunen beraien bloga, ez egitasmoaren blog ofiziala) lehenengo esperientzia izango litzateke. Interesgarria dirudi ahozko praktika idatzizko praktikara ere zabaltzearen saio hau. Jarraitu egin beharko da. Animoa neska-mutilok! Konturatu barik zuek ere "inbentoa" sortu duzue.

http://www.asapala.org/mahatsorriak/txokoa  

A! ...eta ez da nire taldea.

Mapak

Atzo mintzalagunen mapa egiten hasi ginen. Baina Tagzania tresna interesgarria da gure intereseko kontuak lokalizatzeko eta mapetan banatzeko, erabiltzaileen arabera edo etiketen arabera. Nik neuk hiruzpalau biderrez erabili dut joan behar izan dudan tokiren bat aurkitzeko. Horrez gain, norberaren webgunean sartzeko aukera ere ematen dutenez, eta karrajuan testuak izeneko atalean dokumentuak sailkatzeko aukera daukagunez, pentsatu dugu Tagzaniaren laguntzaz gure intereseko mapen bilduma egitean (karrajuko atlas-a, ez da izen txarra).

Horrela bada, honako "liburua" antolatzen hasi gara:

• Euskaltegien mapak: Tagzanian euskaltegia etiketa erabili dutenak. Horren azpian AEKren mapa ere jarri dugu.
• Mintzalagunen mapak: Mintzalaguna etiketaren mapa. Azpitik Berbalagunak (berbalaguna etiketa erabili dutena, mendebaldekoak jeneralean) eta Mahatserriko berbalagunaren mapa (Asapala elkartekoak gure taldeak non batzen diren mapa sortzen ari dira).

Hauek dira momentuz daudenak, baina Tagzaniaren laguntzaz errazagoa da mapa berriak sortzea. Horretarako dena dela kolaborazioa behar da. Lehenengo eta behin atlas horretan zeintzuk mapa gehiago jarri daitezkeen ideiak botatzeko (mezu honen komentarioetan berton), eta bigarrena eta inportanteena, Tagzanian mapetan puntuak markatzeko eta etiketatzeko. Tagzanian, orain sortu diren beste hainbat ekimenetan bezalaxe (wikipedia, del.icio.us,..) kontua ez da batek dena egin eta guztiek jaso, guztion artean dakiguna plazan jarrita informazio eta ezagutza iturri potenteak eraikitzea baino. Euskaltegien eta euskalduntzearen atlas-a adibidez.

Mintzalagun fever

Atzo RSSen gainean nenbilela gaur agregatzailea dantzan ipini didate mintzalagunek. Hiru kontu aipatzekoak:

Lea-Artibaiko berbalaguna "Alarma gorrian" ei dago. Euren blogean zabaldu zuten aspaldian eta gaur sustatura heldu da. Polemikatxo eta guzti. "Euskaldun zaharrak" lortzeko kanpainaren leloa deigarria da duda barik. Aspaldiko eztabaida dabil mundu honetan egitasmoetako partaideei honela ala horrela deitu ez deitu: euskaldun zaharrak, euskaldun osoak, laguntzaileak, ikasleak, mintzalagunak, .... Ez dakit ba, aingeruen sexuaren gainekoa begitantzen zait niri eztabaida hau. Akaso eztabaida serioagoa eta arazo benetakoagoa izan daiteke hainbat egitasmok "euskaldun zaharrak" lortzeko daukaten arazoa. Euskararen aldeko konpromisoak, laguntza, sustengua... jai erraldoi eta makroekitaldietan lortzeko hain zaila ez denean (edo ez dirudienean behintzat), zergatik halako arazoak aparteko ahaleginik eskatu ez eta satisfakzioa ere eman dezaketen jarduerotan? Komunikazio-marketing arazoak? Arazo sakonagoak? Nik neuk honekin nekatuko nuke burua gehiago.

Berriketan eta Zaharberriren blogetan mezu berdina topatu dugu bestalde, ez gara bakarrak. Lea-Artibaiko berbalagunen berri ematen dute berton. Komunikazio arazoak badaude interesgarria da bi egitasmo hauetan blogaren bidez egin dutena, beste proiektuen berri eman eta zabaldu. Egitea nahikoa ez da izaten sarritan, lantzean behin egiten dena zabaldu ere egin behar da. Ondo beraz.

Bitartean, aurton onddoak basoan legez, egitasmo berriak han eta hemen. Gaur hau iragarri dute Artziniegako blog honetan. Arabara ere heldu da sukarra.

Tira ba, hau ospatzeko Tagzania hartu eta mintzalagunen mapa egiten hasi naiz:

mintzalaguna tagged map - Tagzania

Ez daudela denak? Zer uste izan duzue ba? Denak ipiniko nituela? Mintzalagunetako jendea orain arte nahikotxo abila izan da webdosazeroko kontuetan. Beraz,  Tagzanian sartu eta hasi mintzalaguna etiketa zabaltzen (mintza)laguntxuok!

Nik bitartean abarketa prestatzen jarraituko dut.

Euskal Etxea Barcelona » Mintzalaguna Proiektua

Euskal Etxea Barcelona » Mintzalaguna Proiektua - [Berbalaguna del.icio.us]

Euskaldun zahar batekin Bartzelonan euskaraz hitz egin nahi al duzu? Animatu eta bidali orri hau Euskal Etxera!

Vols parlar euskara a Barcelona amb un nadiu? Anima’t i envia aquest full a l’Euskal Etxea!

Horrela dio Bartzelonako Euskal Etxeak antolatu duen mintzalagunaren publizitateak. Atzerriko euskaldunentzako euskalduntze eta praktika jarduerak ugaltzen ari dira.

Lehengo egunean sareko mintzalagunaren berri izan genuen, Brasilen bizi den batek gidatuta. Gaurkoan Kataluniako hau. Atzerriko euskal heritarrak (eta euskal herritarrak ez direnak) ez dabiltza makal, ez. Bartzelonako Euskal Etxearen aktibitatea bizi-bizia da behintzat, denean eta euskalduntzeari dagokionean ere bai. Haren bloga irakurri besterik ez dago.

Mintzalaguna komunitatea, euskaraz internetean

Mintzalaguna komunitatea, euskaraz internetean - Mezu honen bidez , MINTZALAGUNA komunitatera, Euskosareko Euskara lagunen komunitea, ongietorria eman nahi nizueke! [Sustatu]

Sustatun iragarri dute oraintxe. Nik dakidala, lehenengo mintzalagun birtuala. Euskosaren dago kokatuta eta Brasilen bizi den batek moderatzen du. Asmoa halako kafe birtuala eskaintzea da. 36 kide dauka. Errejistratzen saiatu naiz baina ez dit baieztapen e-posta bidali oraindino. Zerbait gehiago dakidanean hemen jarriko dut.

Hemen dago esteka, probatu nahi baduzue:

http://www.euskosare.org/komunitateak/mintzalagunak