30
Mar
2009
Benito

Argazkiak

Badakit apur bat kaparra nabilela Korrikarekin egunotan, munduan besterik ez balego edo. Bihar gaia aldatuko dut, zin dagizuet. Bitartean gauza pare bat nahi nuke esan.

Korrika hau inoiz baino grafikoagoa da komunikazioari dagokionez. Karrerako ekipoari esker Flickr-en bidez egunero argazki partida handia daukagu errepidean zer-non dabilen ikusteko. Ikusi bai, ikusi dute batzuek. Eta ikusi dutena gustatu ez.  Haien gustukorik ez dut uste han topatuko denik baina.

Ez nau harritu Nafarroako Gobernuaren erabaki horrek, egia esanda ez nuen neuk ere gustuko ezer espero handik. Argazki kontuak denak hala ere.

Euskaltzale batzuk ere argazki kontuengatik kezkatuta era berean. Eta...

Erreibinkazioa, aldarria... sano irteten dira berbok Korrika dela eta ez dela, eta sano nahastu/batu batzuk eta besteak ere bai.  Erreibindikazioa, aldarria, eskakizuna, salaketa... amorrua, etsipena, haserrea islatzen duten berbak izaten dira horiek guztiak.

Argazkiak ikusten ibili naiz. Ostegunetik honakoak. Gehien agertzen diren elementuak: petoak, lekukoa eta... irribarrea. Karreristak ez dabiltza negarrez, lekukoarekin batera irria pasatzen diote elkarri, pasatzeko desiatzen daudela esango nuke, irria hedatzeko. Korrikan hitz gutxi egiten den arren, euskarak transmititu egiten ditu sentipenak.

"Ongi etorri" dio aurtengo leloak, eta hori nahi du Korrikak akaso. Elkarri ongi etorri eman. Ongi etorri lagunari, etorri berriari, aspaldian etorritakoari, hemen betik egon denari, hemen inoiz izan ez denari. Ongi etorriaren irribarrea ikusi dudala uste dut.

Eta goiko italiarren eta beheko andre honen irribarrearekin geratzen naiz. Askoz gehiago motibatzen naute irribarreok gobernante batzuen okurrentziek eta geure arteko riki-raka tradizionalek baino.

Askori Korrikak hemendik aurrerako erantzunkizuna ekartzen digu, eta hari ekiteko adorea irribarre horiek ematen digute, lagunok.

PD. Eskerrik asko karrerako argazkilariei hainbeste irribarre ekartzeagatik.

Zerekin geratzen garen

Aitor (ez da egiaztatu)-(e)k 2009, Martxoa 31 - 09:45-(e)an bidalia.

Neu ere, Beni, zu bezala, irriarekin, festarekin, ahalegin zintzoarekin geratzen naiz. Baina neu ere, egia esan behar dizut, harrituta geratu nintzen igandeko BERRIAren azaleko argazkia ikusita. Baina, esan bezala, zurearen antzeko irakurketa eginda, beste elementu batzuekin geratu nintzen.

Hala ere, kontua da gai hauetan (eta aurrerantzean are nabarmenago) gure baitara ez ezik, "besteengana" ere begiratu beharra dugula. Gu asetzen eta pozten gaituenaz haratago, gure sentsibilitate bera ez dutenak ere aintzat hartu beharra dugu, bereziki estona edo sumin dezakeena. Eta ez dut esan nahi gurea den zerbait garrantzizkoari uko egin behar diogunik; baizik eta une jakin batean bigarren mailako elementu edo erreibindikazioak mugatu behar ditugula. Eta euskararen aldeko festa eta aldarri honetan euskara bera izan behar da gunea, euskarak batu gaitzakeelako.

Oraingo honetan aipatutako argazkiaren inguruabarrak erreakzio eta ondorio kaltegarria izan du. Horren berri izan dudanean, haserrea sentitu dut, bai baitirudi aitzakia bila ibili direla Nafarroan Korrika-ri laguntza kentzeko. Baina, ondoren, bigarren irakurketa ere egin dut: ezin zaie batzuei aitzakiarik txikiena ere eman ; are gutxiago, nolabaiteko borondate oneko keinuren bat egin ostean.

Korrika, ekimen pozgarria

Ainhoa (ez da egiaztatu)-(e)k 2009, Martxoa 31 - 11:28-(e)an bidalia.

Nire semearentzat lehen korrika izan da hau, oso zirraragarria. Gauaren xarman egitea egokituta, atsegin handiz aritu ginen hotzak itxaroten, eta erritmo azkarrak atzean utzi gintuenean, bere eskariz harrapatu genituen berriz Antigua auzotik bueltan Kontxan, beste behin atzean arnasestuka utzi gintuzten arte.

Donostian bizita ere, joera handia dute haurrek gaztelaniaz egiteko. Korrikan parte hartzea lagungarri zaio oso bere euskalduntasuna garatzeko. Guk ez dugu argazkirik, baina inguruan nituen gazte eta helduen irribarreak ondo itsatsi zaizkigu begietan.

Politikoki zuzena izatea benetan zaila da gure artean. Presoen aldeko irudiak ekitaldi publiko askotan azaltzen dira, Danborradan adibidez, eta inori ez zaio bururatzen festa edo dirulaguntza bertan behera uztea horregatik. Behobia-Donostia lasterketan ere, maiz ikusten dira horrelakoak eta bestelakoak. Benetan uste duzue kartelak gordeta Nafarroako Gobernuak dirulaguntzak emango dituela? Ala errudun sentiarazi nahi gaituzte gainera?

Mila esker antolatzaileei egiten duzuen lanagatik eta ahalegin itzelagatik. Segi, segi argazkiak ateratzen, gustura ikusiko ditugu eta.

Ez nauzu ni konbentzitu behar

Aitor (ez da egiaztatu)-(e)k 2009, Martxoa 31 - 15:30-(e)an bidalia.

Ados nago zurekin, Ainhoa; ez nauzu konbentzitu behar. Ez dakit beste batzuk konbentzitzerik dagoen; bai, ordea, kontrako jarrerarako argumentuak ematea ekidin.
Argi dago aitzakia izan dela Korrikari diruz laguntzeari uzteko; baina pentsa dezagun ez zuela aitzakiarik behar diruz laguntzen hasteko: total, aurtengo ediziora arte lagundu ez badu, lasai asko jarrai zezakeen oraingoan ere bere horretan. Baina ez; dena delako arrazoiengatik, laguntzen hasi da... eta berehalako batean eten.
Gauza askorengatik miresten dut Korrika; eta hauetako bat hainbat pentsaera eta sentisibilitateko jendea euskararen mundura erakartzeko izan duen eta duen indarra da. Ez dezagun alferrik galdu.

Etsipena eta poza

Benito-(e)k 2009, Apirila 1 - 20:57-(e)an bidalia.

Eskerrik asko bioi, benetan estimatzen dira zuen hitzak, eta zuen tonoa.

Egia esanda, kontu hauek guztiek etsipen puntua zabaltzen dute AEK-ko jendearen artean, Nafarroako Gobernuarenak baino gehiago akaso geure arteko beste kontu horiek guztiek. Eta beharrezko eztabaidak izango dira, baina zurrunbilo honetan sartuta askok bestelakoak entzutea nahiago genuke, batetik nahiz bestetik.

Enpin, gurera dator laster, irribarreak zuzenean sentitzeko aukera izango dugu.

poza, poza eta poza

aitor (ez da egiaztatu)-(e)k 2009, Apirila 6 - 15:58-(e)an bidalia.

Horixe da larunbateko ordu txikietan sentitu nuena Korrikarekin bat egin nuenean Santurtzi eta Portugaleteko mugan bertan. Poza, uste nuen baino jende gehiago batu ginelako, ordua eta eguraldi kaskar samarra kontuan hartuta. Eta poza, Benitorekin bat egin nuenean. Han ari zen bere txanda militantea egiten Korrikaren furgoneta batean. Peto baten bila hurbildu nintzenean izan zen. Berak (zuk) ikusi ninduen/-zun.
Beste egoera batean desberdina izango zen. Baina mezu honen inguruan sarearen bidez aldez aurretik partekatu ditugun Korrikaren inguruko kezkek, buruhausteek eta kezkek halako "balio erantsia" eman zioten topaketari. Han geunden berriro, aspaldian elkarrekin egon gabe, gogoeta- eta kezka-iturri izan zen ekimenaren inguruan eta ekimenak berak elkartuta.

Laster arte, Benito!!

Furgonetaren karga

Benito-(e)k 2009, Apirila 6 - 17:56-(e)an bidalia.

Bai, poza benetan, zeu aurkitzea ez ezik, goizaldeko ordu txikietan Korrikaren inguruan dabilen guztia ikustea ere. Lan militantea diozu, eta hala izango da, baina aurretik dabilen furgoneta horretan ibiltzea Korrikaren espektakulu osoa gozatzeko leku ezin hobea da, izan ere esango nuke jende gutxiago dabilen ordu eta leku horietan ulertzen duzula hobetoen Korrika zer den.

Petoen dirua biltzen genuen guk, baina horrekin batera jendea ikusi, haiekin apur batean jardun, goizaldeko eta egunsentiko isiltasunaren erdian, eta une horretan konturatzen zara atzetik datorren furgoneta ere beste zerbait ibili dela hamaika egunez batzen, eta Gasteizera han batu den jendetzaz gainera zer ailegatu den.

Lan militantea bai, baina plazerra era berean. Askori gomendatuko nieke Korrikaren aurretik ordu txikietan osteratxoa egitea.

Harrera beroa Gasteizen

Ainhoa (ez da egiaztatu)-(e)k 2009, Apirila 7 - 10:50-(e)an bidalia.

Egia da Korrika gauez xarmangarria dela, ixiltasunean asfaltoaren hotsa entzunez eta loari denbora kenduz egiten delarik, argazkietatik eta komunikabideetatik urrun. Beste argazki bat ekarri nahi nuke nik hona gaur, hormirudirako.

Gasteizen nabil lanean eta hotza, oso hotza egiten zait eguneroko joan-etorria, basamortura hurbilduko banintz bezala. Betiko kaleak zeharkatu, lanera etorri, lanetik irten eta etxearen goxoa bilatu ohi dut egunerokoan. Igandetik hona, ordea, asko aldatu zaizkit hemengo bistak.

Denok dakigu oso jendetsua izan zela Gasteizkoa eta askok esango dute kanpotik etorritakook egin genuela oihu, baina nik beste argazki bat ikusi nuen, bihotzera iritsi zitzaidana: Gasteizko jende asko ikusi nuen kale ertzeetan txaloka, harriturik. Euskal-ezdun asko bizi da bertan, Korrikaren berri ez zuten asko, eta hunkigarri egin zitzaidan euren harridura begietan euskararen aldeko txalo horiek entzutea.

Atzo, astelehen buruzuri, Gasteiza etorri nintzen beste behin ere lanera. Orain koloreak ikusten ditut bertan. Mila esker Korrikako antolatzaileei, Gasteizekin adiskidetu nauzue.

Bidali iruzkin berria

The content of this field is kept private and will not be shown publicly.
By submitting this form, you accept the Mollom privacy policy.
Sindikatu edukia