Euskaltegia, blogak, trastoak eta garagardoak

Hiru lagun batu ginen lehengo ostiralean, hirurok euskara irakasleak eta internet eta teknologiaren harrak haginkadatxoa emanda. Zer ikasi asko daukagu honetan eta elkar ezagutu eta ikasteko gogoarekin ipini genuen hitzordua Blog & Beers txiki batean, lehenengo aldiz elkartu ginen hirurok aurrez aurre: Galdakaoko Udal Euskaltegiko Josu eta Iñigo (Berbet@n) eta AEK-ko Benito (Karrajua).

Elkar eta elkartzeko lekua topatzeko hasierako abenturak gora-behera (horiek kontatzeko beste mezu bat beharko genuke...) azkenean bazkari eta bazkalosterako batu ginen Deustuko txoko batean, eta abarketari ematen hasi.

Hiru orduk asko esateko ematen dute, eta asko esan genuen, gauza askotaz. Niri neuri buruan geratu zitzaidana (edo ondo betetako kaña batzuen ostean akorduan geratu zaizkidanak).

Blogak eta internetez hasita, ikasleentzako blogei kostatzen zaie funtzionatzea. Ahalegin handia egin behar da, eta ikasleek ez dutela entusiasmo handiegirekin hartzen. Beharbada, ikasleek beste zerbait nahi-behar dute, ez hain publikoa, itxiagoa eta elkarreragin gehiagokoa... Ez dakigu zer zehazki: foroak, sare sozialak, galderak botatzeko lekuak... Eurek ere zerbait nahi dutela uste dugu, euskara ikasten laguntzen dien zerbait, eta norbaitek asmatuz gero arrakasta edukiko luke, baina zer hori asmatzea da kontua.

Teknologiarekin jarraitu genuen, egunero eskutartean darabiltzagun gailuez jardun genuen hain zuzen: mugikorrak, kamarak, mp3ak... Bi gauza besteak beste. Batetik, egunero erabiltzen ditugun horiek zenbat kostatzen zaigun aplikazio "profesionalak" topatzea, aisialdiarekin edo kapritxoarekin lotzeko joera izaten dugu, eta klasean berriz, lehengoarekin jarraitzen dugu: kaseteak, DVDak, arbela... Ideiatxo batzuk irten zitzaizkigun han asko pentsatu barik: arbelean idazten ditugun grafiko eta eskemei argazki digitalak ateratzea, mugikorren eta kamara digitalek bideoa grabatzeko eta ikusteko erabiltzea, DVDak, kaseteak eta bideoak ordenagailu mugikorrekin ordeztea...

Bestetik, eta aurrekoarekin lotuta, horrelako gailuak erostea edo erabiltzea proposatzen denean inguruan zelako eszeptizsimoa aurkitzen dugun komentatu genuen, badirudi hain gauza txikiek ezin dutela jarduera "serio" baterako balio izan.

Irakasleez eta sareaz ere hitz egin genuen. Hainbat lagun han eta hemen lan berdina egiten eta orain arte sarea ideiak, materialak, egiten dugunaren emaitza eta kezkak konpartitzeko hain gutxi erabiltzea bekatua dirudi. Arrazoi asko egon daitezke hau azaltzeko, baina seguruenik ez da inor etorriko honi buelta ematera norbera hasten ez bada. Hor egon daiteke blogen indarra gurean, irakasleon jardunaren gainean berba egiteko eta ideiak eta materialak konpartitzeko eta garatzeko tresna bezala erabiltzea.

Ideiatxo pare bati hasi ginen forma ematen honen inguruan. Norberaren materialak publikatzeko, konpartitzeko eta probatzeko sistema bat, irakasleon indarrak batzeko azken batean. Ideiari bueltak ematen hasi gara, ea zer ematen duen. Probatxo batzuk egin behar ditut. Laster izango duzue horren berri.

Inor animatzen da gurekin lantzera? Eta hurrengoan kaña batzuk hartzera?

Hau neure laburpena izan da, baina seguru Iñigok eta Josuk gauza gehiago dauzkatela apuntatuta.