Karrajua - hizkuntza - Comments

Ez konplikatu

Benito — Wed, 28 May 2008 00:37:16 +0200

Ez dakit, bestelako interpretazioa egiten dut nik bai bata bai bestearen hitzetatik. Karmeleren adibidea akaso ez da aproposena izan, "diezazkiokegu" horrekin mamu asko altxatzen dira, baina egia da, aldi berean, oraindinokarren euskara ikastea hizkuntzaren esentzia harrapatzea dela uste dutela askok, eta ez ikasleak bakarrik. Seguruenik hizkuntza erraztea gauza bakoitzari daukan pisua eta balorea ematea baino ez dela esan nahi da, eta ez alferrikako konplikazioetan ibiltzea. Hainbeste aldarrikatzen den ikuspegi komunikatiboari kasu apur bat egitea besterik ez agian.

Pili Carrascoren eskakizun bat, berriz, ezin argiagoa da: euskara ikasi eta landu nahi dutenei aukeren esparrua zabaldu behar zaie, ezin dugu modulazio sistema zurrun eta zaharkitu honetan jarraitu. Euskara ikasteak askoz abaniko zabalagoa behar duela, eta halaxe da izan ere, hori onartzea eta bide berriak zabaltzeko ausardia da arazoa akaso.

Euskara erraztu!!! Euskaldun

kokoteraino! — Tue, 27 May 2008 18:56:15 +0200

Euskara erraztu!!! Euskaldun berriei leku gehiago egin????

Barkatu baina horrela esanda, ez nago batere ados. Nik entzuten dudan euskarak ez du konplikaziorik: erraza da nire lagunek egiten dutena: egokia, arina, azkarra, alaia... Euskera zaila dela? Ez dut uste espainiera ikastea errazagoa denik, ezta pentsatu ere. Askoz zailagoa omen da.
Komunikabideetan ere zailtasun gutxi! Traketsak eta ulergaitzak bai supermerkatuetako itzulpenak! Baina hori beste kontu bat da, ezta?

Eta euskaldun berriei leku gehiago??? Berriro hasiko gara euskaldun zahar, euskaldun berri lelo horrekin???
Ez, barkatu. Ez naiz horrekin hasiko!!!!

Erraztu? Pobretu?

leire narbaiza — Tue, 27 May 2008 18:47:10 +0200

Oso arriskutsua iruditzen zait "erraztu" horren gainean jardutea. Nik dakidala 2.mailarako ematen dira ahalerak eta subjuntiboak.
azken bi ikasturteotan 2. maila ematen nabil, eta beti esaten diet ikasleei dakitenarekin problema barik bizi litezkeela euskaraz. Hala da. 2. eta 3. mailetan "txitxi-biritxi" asko ematen da, gramatikari dagokionez. Gramatikan 1.maila jakin eta produzitzeko eta ulertzeko maila garatua daukanak ez dauka arazorik. Hitz egitean dator arazoa, baina.
eta azterketetan. Ni kokoteraino nago. Sekulako maratoiak egiten dituzte ia loteria tokatzen zaien non edo non: maila, perfila, hizkuntza eskola, oposizioa,.....
Hori ez da sanoa. Eta Habek hori bultzatzen dihardu mailen azterketekin.
Ea denak bateratu eta konbokatoria bakarra dagoen!

Pertzepzioa, horretan dago kakoa

aitor — Tue, 27 May 2008 15:57:23 +0200

Kontua ez da, nire ustez, zein den errealitatea; kontua, batez ere, hiritarrek errealitateaz duten pertzepzioa, beraiek halaxe ikusten dutelako edo beste batzuek ikustarazten dietelako.
Eta errealitatea dena da: benetan zertan den eta jendeak hori berori nola ikusten duen.

Inposatutako pertzepzioak

otto — Tue, 27 May 2008 14:52:57 +0200

Nik uste kontu honekin guztionekin etsaiaren amarruan jausten ari garela.

Ez naiz ni IVAPek darabiltzan azterketa ereduen alde egiten hasiko; baina zein da inposatutako hizkuntza Euskal Herrian? Zeinek egingo luke lanerako aukerak galtzea Euskal Herrian? Euskarak ala gaztelerak?

CACa eskatuko bagenie herritarrei....

Erraztu

aitor — Tue, 27 May 2008 10:55:03 +0200

Oso ona iruditu zait dena.
Lehenengo eta behin, zu, Benito, hain adi egotea inguruan argitaratzen denari; bestetik, zure obeserbatorio horretatik jasotako bi perlak; eta, azkenik, Ottoren gogoeta.
Nik ezer eranstekotan, euskara21-erako idatzi dudan ekarpenetik atal hau erreproduzitu nahi nuke hemen:

Hizkuntza Eskakizunez ari naiz:

"Txostenean aipatzen da kontu hau. Besteak beste, nolabaiteko berrikusketa bat proposatzen da, HE erabilerarekin lotzera begira; bestetik, gizarte mailan nolabaiteko kostua edo esfortzua onartu beharra azpimarratzen da, aginduak oso gutxitan baino ez direla denen gustukoak onartzen da…

Nik neuk uste dut HEen gaiaren inguruko hausnarketa sakon bat egin beharra dagoela. Azaleko lehen elementua ematen/lortzen diren emaitza kaskar-kaskarrak dira. Edozein deialditako emaitzei erreparatzea besterik ez dago hau konprobatzeko. Ez da normala ez logikoa horrenbeste “ez gai” ikustea. Tartean izango dira inolako prestaketarik gabe joaten direnak, ahalegin txikiena ere egin ez dutenak…; baina honek ezin du dena zuritu edo azaldu. Emaitza txarren kopurua hain handia den kasurik gehienetan, aurkeztutakoen gaitasunik ezak ez du dena azaltzen. Bestelako irakurketa bat egin beharra dago. Euskararen irakaskuntzan egiten dut lan, hainbat ikasle izan ditut eta ditut Osakidetza eta IVAPeko HEetako azterketetara aurkeztu direnak edo aurkeztu beharra dutenak; eta beraientzat kontu hau gero eta mamu beldurgarri baten itxura hartzen ari da, muga gaindiezin bat, lorpen eskuraezin baten trazak hartzen ari da.

Honekin batera, sarri askotan egiten den beste kritika baten arabera, lanpostuen adjudikazioan neurriz kanpoko balioa ematen zaio Hizkuntza Eskakizunari, gaitasun profesionalaren aldean.

Eta honek guztiak, albo eragin bezala, euskararen beraren pertzepzioan ere eragin nabarmena du: inposaketarekin lotzen da, tituluan soilik jartzen da begirada e.a.

Egia esan, ez naiz inor kritika hauek baloratzeko eta zer duten egiatik zehazteko. Edozein kasutan, honen guztiaren aurrean, nire uste apalean, hainbat galdera egin beharra dago.

* Egokiak dira benetan Hizkuntza Eskakizunak egiaztatzeko diseinatuta dauden frogak? Euskararen benetako jakite-maila erakusten dute? Funtzionario batek bere lanerako behar duen euskara maila benetan ziurtatzen dute?
* Aurkezten direnen prestakuntza bermaturik dago? Nahikoa eta egokia al da?
* Nortzuk aurkezten dira? Nola? Hau da, iradoki egiten zaie? Nolabait behartuta al doaz? Azterketa nolakoa den probatzera joan eta porrot egin duena berriro aurkeztera animatzen da?
* Egiten al da aurkeztu eta gainditu ez dutenen jarraipena? Aztertzen da zein den gainditu ez izanaren arrazoia, zertan egin behar duen indar hobetzeko?
* Lanpostuen adjudikazioan, zentzuz, neurriz eta orekaz baloratuta daude lanpostu bakoitzak berarekin batera eskatzen duen kualifikazio profesionala eta linguistikoa? Azterketa hau modu transbertsalean egin beharko litzateke HPS eta lanpostua kokatuta dagoen arlo, zerbitzu edo sailaren artean."

Zer erraztu?

otto — Tue, 27 May 2008 08:45:41 +0200

Azken aldian, halako hots ugari entzuten dira, ezta? Erraztu. Euskara jendea gogaitzen dabil; azterketak eta agiriak direla eta, jendeak gero eta gorroto handiagoa hartzen ari zaio euskarari...

Baina niri beldurra ematen dit jendeak azterketak erraztea proposatzen duenean, irtenbide gisa. Azterketak, normalean, mailaren deskriptoreek diotenaren azpitik egoten dira. Horrek esan nahi du, berez, azterketa gainditu arren, ez duzula zertan maila izan. Eta horren adibide franko ditugu, guk denok, begi bistan; ala ez? Orduan, gero ezin kexatuko gara ganorazko zerbitzua euskaraz jasotzen ez badugu, ezta?

Nik dakidala, hemen inor ez da behartzen "diezazkiokegu" jakiten; nire amak sekula ez du esan halakorik, eta oso euskalduna da.

Hizkuntza guztietan gauza bera gertatzen da, ezta? Eginkizun batzuetarako, hizkuntza-maila bat beharko duzu, eta beste batzuetarako, beste bat. Hortxe dago gakoa, egin dezagun beharretara egokituko den euskara, eta irakats dezagun, euskaltegiok, eta lagun dezatela, erakundeak, helburu ezberdinekin ikasten ari diren euskaldunak. Kito!

Eta, erraztekotan, ikas prozesua erraztu dezagun; erraztu baino gehiago, eraginkortu.

Eboluzioa aurrera!

Benito — Sat, 10 May 2008 21:42:10 +0200

Eboluzioari kasu egin behar zaiola diote horiek. Arrazoia edukiko dute igual. Siniestro Totalek aspaldian aldarrikatu zuen:

Aurrera eboluzioa! Kar, kar, kar...

Egitura diglosikoa

Luistxo — Thu, 08 May 2008 09:51:16 +0200

Webgunean interfazea euskaratu dute, baina ez dute edukia bereiztu. Erdarazko mezuak agertzen dira euskarazko interfazean ere. Horrela ezin da. Euskarazko iritzi truke bat egon dadin, edukia elebakartu behar da, bestela diglosia gailentzen da.

Blog edo foro elebidunaren sekretua ez da oso konplikatua: bereizi edukiak, eta interfazeak. Gazteleraz mezu sorta, eta eztabaida batzuk. Eta euskaraz, beste batzuk. Bien nahasketa, diglosirako bidea da.

Denbora kontua?

Benito — Wed, 07 May 2008 20:39:23 +0200

Duela astebete inguru zabaldu da Euskara21 hori. Akaso ez da egon ezagutu eta saltseatzeko astirik. Igual guneak ez gaitu euskaltzaleok motibatu oraindik. Akaso hor planteatzen den eztabaida horri ez diogu atarramendu handirik ikusten. Dena dela, arraroa da bai hain erantzun gutxi egon izana. Hemendik egun batzuetara zer gertatzen den ikusi beharko da.

Bestalde, mezuan diodan bezala, euskaltegiak, euskara ikastea, tituluak... sarri aipatu dira. Hala ere, kasu askotan neuri behintzat zer pentsatua ematen didate, baina askotan ez nuke jakingo zer erantzun. Adibidez, baten bat itota dabilela tituluekin, klaseekin, ez duela profila lortzen... Horren aurrean argudio gutxi egon daitezke gehienetan. Sentipenak dira, eta konstatazio horretatik ondorioak ateratzen saiatu gaitezke gehienez, baina erreta dagoenarekin eztabaidan sartzea, ez dakit ba.

Tentazioa

txerra — Wed, 07 May 2008 18:46:44 +0200

Ni ere tentatuta izan naiz idaztera, parte hartzera edo nire blogera eramatera, eta oraindik ez naiz ausartu. Diskusioen tonua eta edukiak oso urruti ikusten ditut: inposizioa, hizkuntza eskakizunak, lanerako behar, profesionalen alde egitea, ama hizkuntzaren apologia merkeak, ...

Baina harritu nau euskaltzale gehienek nire antzera egitea. Beste batzuetan blokean erantzuten duen euskaltzale multzoa (adibidez, periodiko famatu horren harira) isilik dago. Antza, "erdaltzaleen" argudioen aurrean kikilduta, tatami ideologikoan ere garaituta. Ez nuen espero, baina ....

Be water, my friend

Benito — Wed, 07 May 2008 01:02:18 +0200

Malgutasuna, hori da! Be water, my friend.

Bruce Lee-k eman digu pista bat akaso.

Flipatzearena dela eta...

Txelis — Tue, 06 May 2008 22:34:07 +0200

Malguak izan behar diagu, Benito. Malguak.

Lobby-a eta ondo antolatua

leire narbaiza — Tue, 06 May 2008 18:21:01 +0200

Orain oso modan jarri da "hizkuntza autonomikoei" egurra banatzea: Gure umeek ezin dute gaztelaniaz ganoraz ikasi, ez dago aukeratzeko eskubiderik, euskara inposatu egiten zaigu, inork ez du erabiltzen...Horrelako baieztapenak batzuen ahotan dabiltza, eta El Correo españolek indartu egiten ditu.
Eskerrak artikulua luzeegia den! Erdiak bidean aspertuko ziren!
Lobby-arena, baina, uste dut egia dela; edo nahi baduzue kanpaina antolatua. bestela ikusi the Guardian-en zer atera duten http://www.guardian.co.uk/world/2008/may/04/spain
(hemendik atera dut: http://aboutbc.wordpress.com, ez pentsa atzerriko prentsa kuxkuxeatzen ibiltzen naizenik!)
Ez dut uste kointzidentzia hutsa denik!

Lobby-ak

Benito — Tue, 06 May 2008 13:48:03 +0200

Ba, nik dagoeneko ez dut horrelakoekin flipatzen. Lobby-a badago, argi dago aspaldi honetan ekinean dabilela lobby moduko bat Espainian "hizkuntza autonomikoen gehiegikeriak" bere lekura ekarri guran. Katalunian aspaldi dabiltza, Galiziara ere zabaldu ziren, eta EHan azkenak izan gara nonbait.

Zer asmo dabil honen inguruan? Politika kontuak azken batean, eta hartarako pausoen artean honelako usteak eta jarrerak hedatzea.

Hau ez da gerrila, ez. Armada ondo antolatua eta hornitua baino. Argudioak eta diskurtsoa beti berdinak.