Karrajua - ikasmaterialak - Comments

Ekitaldi honetara nahi duena

ainhoa — Mon, 06 Oct 2008 20:40:17 +0200

Ekitaldi honetara nahi duena hurbil daiteke, jakina. Ondo dago begirada batean argitaratzen diren euskarazko unibertsitate liburuak ikustea, betiko paperean. Hitzaldi, aurkezpen eta mahai-inguruetan nahi duena sar daiteke. Tailerretan aldez aurretik izena eman behar da, batez ere leku kontuagatik, baina nahi duenak eman dezake izena. Hauek dira tailerrak:

- Liburu elektronikoen ekoizpena, formatu berriak, edukiak interneteratzeko bideak. Fernando Morillo idazlea.
- Euskarazko testu-sorkuntzarako baliabide telematikoak eta software librea. IXA taldea.

Han ibiliko gara!

Maisuaren berbak

Benito — Thu, 10 Jan 2008 20:27:27 +0100

Jode Patxo, eskerrik asko loreengatik, baina maisuen maisu horrekin mendi baten puntan tenplua ipini eta han zutabe baten gainean jezarrita diszipuluei sabidulentzia banatzeko gogoa eman didazu. Honela edo:

Gainera, erreferentziaren norabidea hemendik aurrera alderantzizkoa izango dela susmatzen dut.

Eskerrak

Patxo Landa — Thu, 10 Jan 2008 12:51:12 +0100

Maisuen maisua!
Zurea bai lan ikaragarria: sortu, antolatu, hausnartu, agoantatu... eta gainera zabaldu. Ezin da gehiago eskatu blog batean.
Guretzat hasieratik erreferentzia izan den blog batean, gainera.
Eskerrik asko, benetan.

Ikasmateriala

Josu — Fri, 14 Dec 2007 13:57:06 +0100

Aldatu beharko litzateke gaur egun "argitaratu" hitzaren esanahia. Biderik eraginkorrena, nire ustez, dena (testu, liburu, bideo, entzungai, argazki, power-point...) sareratzea da. Aurreko euskaltegiblogs&beers hartan zirriborratutakoaren haritik, adibidez (scribd...). Kontua da horrek eskatzen duela nolabaiteko zentralizazioa; Ikasbil paralelo baten antza izan lezakeena. Horretarako ezinbestekoa litzateke euskaltegi guztietan irakasleen eskura ordenagailu asko eta onak, banda zabalera nahikoa... "Konekta zaitez" haren antzekoa euskaltegientzat. Eta jakina, irakasle bakoitzaren prestakuntza teknikoa eta -zailena dena, agian- irakasle bakoitzak bere material kutuna musutruk partekatzeko borondatea.

100 ariketa

Benito — Thu, 13 Dec 2007 19:24:25 +0100

Baten bat faltako zela, eta halaxe da.

Elkarrek 100 ARIKETA EGA AZTERKETAKO IDAZLANA ERRAZ EGITEKO atera du, Josu Erkiagak egina.

Ez dakit Durangorako ala lehenagokoa den. 2007koa dauka argitalpen data behinik behin.

Inork aztertu du? Zelan dago?

Dena dela, 3. maila datorrela ez dakit izenarekin asmatu duten.

PD: Liburu hau ez dator bakarrik, Roberto Tejera-Bollainek atondutako Portugoieta sortako beste hiru hauekin dator (batzuk lehenago argitaratuta daude):

Elkar-ekoak euskaltegietan eskaintza egiten ei dabiltza gainera. Ez gara ahaztutako nitxoa, ez.

Zer esanik ez

Benito — Tue, 11 Dec 2007 13:21:18 +0100

Zer esanik ez, Aitor. Hori ondo egindako lanaren pagua da beti.
Konpartitzeagatik hartu behar den aparteko lana eskertzeagatik nabil ostera. Hori ez da hain erraz ematen eta sumatzen.

Azken finean, badaukagu nork eskertu

Aitor — Tue, 11 Dec 2007 10:45:10 +0100

Esker bila bagabiltza, ikasleak eurak dira eskertzen lehenak. Ondo egindako lanak (hau da, mimoz, kariño pizka batez...) ia beti dauka bere ordaina.
Eta ikasleez gain, ondoan dituzun lankideak. Hortik aurrera, ikusteko dago.

Ikasmateriala

Benito — Tue, 11 Dec 2007 00:50:15 +0100

Irakasle lanpetuen asuntua komentatzeko modukoa dela uste dut. Hala ere, uste dut batzuetan ikasmateriala sortzea gehiegi lotzen dugula ondo editatu, maketatu eta hornitutako dokumentuekin, edo liburuekin.

Eta ikasmateriala askotan jarduera baten kontakizuna, ideia bat izan daiteke beste barik. Honelako, honelako edo honelako zerbait adibidez.

Jakina horrelakoak egiteko gauza batzuk behar dira: zer kontatua eduki (baina askoren artean zer kontatua derrigor egon behar da), kontatzeko modua eduki (denbora, bideak, tresnak, trebezia,..) eta kontatu nahi izatea (motibazioa, trukean zerbait jasotzea, jarrera, ausardia...). Azken bi hauek dira kritikoenak nire ustez.

Ez da erraza izaten konpartitzen jartzea, areago inork ez badizu eskertzen, komentatzen edo baloratzen, inork ez badu zure modura egiten, eta gainera egiten duzunak meriturik ez daukala uste baduzu. Ahaleginak ez duela merezi sentitzen baduzu azken batean.

Ze, ahaleginak merezi duela sentituz gero beharbada lan-kargaren pisua arindu ere egin litekeela uste dut. Ala ez?

Asko balio dugu, lagunok!

Aitor — Mon, 10 Dec 2007 18:56:59 +0100

Benitok ia dena esanda dago.

Edozelan be, nire gogoetatxoa jarri aurretik, gauza bat argi utzi nahi nuke: ondoren datorrena euskaltegiotan lan baldintza duin samarrak ditugunontzat dela; hau da, "lau eskola ordu, hiru gainontzeko zereginetarako" eskemara egokitu ahal garenok. Badakit mundu honetan ari diren nahikotxoren lan baldintzek ez dutela aukera handirik eskaintzen ur handiagoetan bustitzeko eta nahikoa dela eskola duin bat eskaintzeko baldintza minimoak izatea.

Hau argi utzita, tituluan diodana azpimarratu nahi nuke: asko balio dugu, gai gara material berria sortzeko, geu gara egokienak horretarako, geure ikastalde eta ikasleentzat pentsatuak eta diseinatuak baitaude. Honen osagarri leudeke Benitok komentatzen dituen hainbat kontu: materialok sortzeko eskura ditugun euskarri informatiko berriak, materialok konpartitzeko sortu beharko liratekeen informazio-sareak edo partekatzeko guneak... Ez dut inolaz ere uste "aitatxo HABEk" edo "amatxo AEK"k emango digutenaren "janaria"ren zain egon behar dugunik.

HABE aipatu dudala, berak kudeatzen "Ikasbil" gunea (behin baino sarriago esan dut) aspaldiko urteetan eskaini duen zerbitzurik onena, zentzukoena eta erabilgarriena da; orain, gainera, "Osatuz" zerbitzuak osatuta. Bertan eskaintzen diren dokumentu errealetan oinarrituta (eta hainbat kasutan lantzeko prozedurez edo-ta sekuentziez ornituta) makinatxo bat lan egin daiteke/dezakegu. Gogoan ditut garai haiek (duela 15-20 urteko kontuez ari naiz) Emakumearen Eguna, Eguberriak, Santa Ageda edo dena delako ospakizuna hurbiltzen zenean, zenbat eta zenbat denbora erabili behar izaten genuen egunari edo garaiari lotutako dokumentu ziztrin baten bila... Orain di-da batean eskura genezake handik edo hemendik, edonoren esku dauden bilatzaileen bidez, dokumentu egokia.

Beste kontu bat da lanketa prozedura eredugarriak eskaintzea eta partekatzea.Honen premia nabaritzen dut; baina premia honi erantzutea ere gure esku dagoelakoan nago.

Horixe da arazoa Jabi,

Karrajua — Fri, 06 Apr 2007 17:43:08 +0200

Horixe da arazoa Jabi, artxiboak jaitsi, berkodifikatu eta eskegitzeko lekua bilatu, igo eta markatu. Ez da aukera txarra, baina arazo bi dauzka:

Egin behar den lana. Ikasbilen eskaintzen diren entzungaiak hartu, jaitsi, berkodifikatu eta berriro publikatu. Ideian hain zuzen ere, dauden lekutik estekatua norberaren neurriko podcast-a egitea izan da. Norbaitek lan hori hartu nahi badu ondo, baina tira!
Egile eskubideak (Aaaagghhh!). Euskadi Irratiko grabazioak izaten dira gehienak. Ez dira eduki libreak, beraz, ez dakit norberak noraino daukan berpublikatzeko baimena. Dauden lekura linkeatzea ere ez dakit baimenduta dagoen, baina tira...

Ohartxoa bide batez, Odeo zerbitzua aipatu dugu. Odeon dagoneko konturik ez badaukazu, kontu berriei ez zaie fitxategiak igotzeko baimenik ematen. Odeoren sortzaileak Twitter modakoaren berberak dira, eta Twitter garatzen zentratu nahi dutenez Odeo saldu guran ei dabiltza. Dena dela mp3ak jartzeko zerbitzu gehiago daude, disko gogor birtual asko adibidez (box.net, archive.org,...). Hori bai, kontuz ematen duten banda-zabaleraren mugarekin.

Pitufo efektua kentzeko

Jabi — Fri, 06 Apr 2007 13:49:14 +0200

Hain zuzen ere, lehenengoan HABEko ikastaro horietan dabilen batek galdetu zidan nola egin MP3ak igotzeko, blogari.net-ek ez baitu artxiboen ostatatzea bere zerbitzarian egiten (normala denez). Gomendatuko dizkiot zuk aiatutako zerbitzuak.

Bestalde, Chipmunks edo pitufo efektua esaten zaio audioen efektu horri eta Flash-ek duen ajea da. Konpontzeko, mp3a kodifikatu behar da jatorrizko artxiboak zuen samplerate (frecuencia de muestreo) berean: wav artxiboa mp3ra pasatzeko, jatorrizkoa 44.100 Hz bazen, mp3a ere 44.100en ezartzen dugu, nahiz eta bitrate 56Kbps mono jarri. Bilbo Hirian hala egiten dugu eta ez dugu jada horrelako arazorik. Info gehiago ingelesez hemen:
http://www.summitsolutions.co.uk/blog/how-to-correct-the-chipmunk-effect-in-the-podpress-flash-player

Materialarena

Karrajua — Sun, 11 Feb 2007 20:23:47 +0100

Oraintxe ibili naiz Joseba Ezeizarena irakurtzen. Bat nator zurekin, lan sistematikoa eta zehatza. Izan ere, bibliografia ikusita badirudi doktorego tesi baten barruko lanaren lagina dela. Hala ere, burutazio pare bat etorri zaizkit.

Curriculumaren ebaluaziorako jarraibidea izan daiteke Josebaren lan hau, duda barik, baina, HEOKen teoria noraino betetzen den enfokatuta dagoela iruditu zait. Ondo, baina horrekin batera beste ikuspegi batetik ere hartu behar da ebaluazio hori nire ustez, erabiltzailearen ikuspuntua eta emaitzak. Alegia, ikasmaterial horiek, curriculumaren oinarrien betekizuna gora-behera, zer emaitza lortzen duten eta erabiltzaileek (ikasle zein irakasle) horiekin zer pertzepzio duten ere aztertu beharko litzakete: egokitzapena, ulertzea, asebetetzea, erabilgarritasuna,... Aldi berean, ondo egongo litzateke emaitzak ere aztertzea, ikasmaterial bata edo bestea erabilita zer lortzen den, aurrekoa da horren parte bat, eta horrekin batera, hasiera mailako epean ikas-helburuen betekizuna. Azken baten teoria kurrikularra ere ebaluatu behar da, ez haren betekizuna soilik.
Ondo egongo litzateke era berean, Josebaren lanaz baliatuz, ikasmaterialen azterketa zabaltzeko gidoiak edo formazio-jarduerak prestatzea. Ez dakit Josebak horretarako asmorik daukan, baina hurrengo pausoa izan behar du nire ustez. Aspaldian idatzi nuen zerbait material-kritikaren beharraz hain zuzen ere.
Josebaren ondorioei erreparatuta, argi dago oinarriak praktikara eroaten ez gabiltzala bizkor. Gainera, aztertu dituen ikasmaterial gehinenak "inpekableenatakoak" izan beharko lukete, HABEtik bertotik etorri direnak gehien bat. Honek pentsarazten dit euskaltegietako irakasleen egunez eguneko jardueran zelan ote gabiltzan.
Azken baten, HEOKen bezala, praktika pedagogikoan ere ezagutzatik erabilerarako continuum-ean etenak daude.

Josu Peralesena irakurtzen hasi naiz orain. Ea zer dioen. Jarraituko dugu.

Hizpidekoak

plisti-plasta — Sun, 11 Feb 2007 19:56:18 +0100

Boteprontoko balorazioak badira ere, hona labur-labur Hizpiden agertzen diren artikuluei buruzko balorazioa:

Ikasle hasibedrriei euskara irakasteko materialak (I): Hiru mugarri gaitasun komunikatiboa jomuga. Joseba Ezeiza.

             Lan sistematikoa eta zehatza iruditu zait, non ikusten den HEOKek zenbateraino eragiten
          duen material hauen diseinuan. Ezin ukatu eragina izan baduela, baina ez nahi adinakoa
          eta ezta norabide argikoa ere. Bada pentsa, materialaren erabilera jaisten bagara. Pozik
          hartu dut lana. Badirudi HEOKen inplementazioaren ebaluazioan hasiak garela. Bada garaia!

Internet ikasgelan: wikiak. Agurne Aizpitarte, Natxo Guillén.

Bat nator zurekin, artikulu arina, garbia eta praktikoa iruditu zait. Adibide potenteagoak
beharko lituzkeena baina.

Ingurune naturala eta ingurune formala: gaia zertan den. Josu Perales.

          Hizkuntza baten eskurapenean ikaskuntza akademikoa eta murgilketaren uztarketaz. Alegia,
          ikaskuntza formala eta ez formalarenaz.
          Artikulu sakona eta argi erakusten diguna zer nolako aukera eta beharra dugun sare
          sozialak eraikitzeko. Hemen sartuko lirateke Mintzalagunak... AEKn gehiago ari zarete
          honetan baina beste sare batzuetan dihardugunoi ematen digu zer pentsatu kontu honek.

Hitz-ordena lantzen. Pello Esnal.

Txapela kentzeko moduko artikulua. Galdegaiaren kontua ederki asko argitzen duena baina askoz haratago ere badoana. Besteak beste, gramatika bere tokian ipintzen du eta
estrategia komunikatiboen garrantzia azpimarratzen. Interesgarria oso.

Lexikoa lantzen. Pello Esnal.

Aurrekoa baino arintxoagoa iruditu zait. Buelta pare bat gehiago behar duenaren sentsazioa
izan dut.

Badakit egin ditudan komentario batzuetan murrizkeriaz jokatu dudala baina hemen bota ditudanak azaleko inpresioak baino ez dira. Dena den, horietako zenbait artikuluk egin dudana baino irakurketa pausatuagoa behar dutela aitortu behar. Ea denbora apur bat ateratzen dugun non edo nondik.

En todo caso...

eq — Fri, 02 Feb 2007 21:59:09 +0100

No conozco el eusquera, de modo que no sé si el motivo de citar una entrada de mi blog es el elogio o la crítica. En todo caso, el enlace no es correcto, de modo que en Habemos es correcto pueden juzgar por sí mismos. Saludos

Kurrikuluak...

Benito — Tue, 30 Jan 2007 18:36:48 +0100

Nire ustez aldatu behar dugun txipa askotan HEOK baino bastante lehenagokoa da. Eta ez dut uste predikatzen duguna eta egiten duguaren arteko disfuntzioak ideien asimilaziotik datozenik soilik. Konstruktibismoa ata AOIren aurretik aspaldian gabiltza komunikatibo adjetiboa aldaera guztietan aldarrikatzen adibidez, eta neuri behintzat gaur egun ere kostatzen zait hizkuntzaren ikuspegi komunikatiboa jarduera didaktikoetan (ez didaktikaren gaineko jardunetan) lokalizatzen.

Eta ez da erraza ez, presa gehiegi izaten dugu askotan aurrerakoi agertzeko (publizitatean gehien bat), eta ideia berriekin iraultza egin, lehengoa kentzeko eskatu, eta dogma berriak egiteko, ondo-ondo aztertu, probatu, landu eta baloratu barik sarri.

Edozelan ere, baliagarriak izan daitezkeen ideia eta bide batzuk onartu eta aldarrikatu ditugu urteotan, EKPetan idatzi eta zigilua ipini. Jakinda errealitatea barik erronkak direla gehien bat. EKPei errepasoa egin zieten HABEn duela laupabost urte, entregatu behar izan zirenean. Ohar batzuk egin eta hor daude. Curriculum-a hobekuntza tresna ere baldin bada, ez da sasoia, Valentziako horiek egin duten bezala, daukaguna eta nahi genuena alderatuta, buelta pare bat emateko? HEOKetik hasita jakina.

Beste kontu bat aipatu duzu. Laguntza. Galdera egingo dizut, zeuri eta irakurtzen duzuen guztioi. Laguntza hori noiz-zertan beharko zenukete gehien bat? Zer-nolako laguntza adibidez?

Laguntza dela eta, Makel(ele)ko post hau etorri zait burura: Habemos es correcto. Zergatik ote?