Karrajua - moodle - Comments

4. faktorea, akaso?

Ainhoa — Wed, 23 Apr 2008 19:50:11 +0200

Erantsiko dut, ba, beste bat zerrendarako. Unibertsitatean nolabait behartuta gaude kongresu eta jardunaldietan parte hartzera, gustatu ala ez gustatu, horren arabera zenbatesten baikaituzte. Hala, lotsak galdu beste aukerarik ez dugu unibertsitatean puntuak lortuko baditugu.

Euskaltegietan, ostera, ez da gehiegi baloratzen zenbat hitzaldi edo komunikazio aurkeztu duzun, orduan, zertarako ahalegindu? Zertarako gastatu dirua garraioan, kongresuetako inskripzioetan eta enparauetan? Hala ere, unibertsitatean lanean hasi nintzenean nire harridurarik handiena izan zen ikustea zein ona den euskaltegietan egiten ari den didaktika lana. Beharbada ez gara konturatzen edo gure lana gutxiesten dugu, horregatik ez gara ausartzen honelako plazetan, baina urte askotan pedagogiaren teoriaz mintzatu diren askok urteak daramatzate ikasgela sentitu gabe, teoria perfektuak aurkezten.
Irakasle power harian aipatzen zenaren ildotik, sinetsi egin beharko dugu baliotsuak garela, nahiz eta sozialki (eta ekonomikoki ere) euskaltegiko irakasleen lanbideak hala aitortu ez.

3. faktorea

otto — Wed, 23 Apr 2008 16:34:38 +0200

Bat nator, orokorrean, Benitok aipatzen dituen bi faktoreekin: jende aurrean hitz egitea, gure kulturan, Everest igotzea baino oztopo gogorragoa da gure garapenean; eta konpetentziaren esku informazioa sensiblea uztearenak ere, izango du bere garrantzia baina nago, gaur egun, denok dugula elkarren berri, gutxi-gehiago.

Hirugarren faktore bat aipatu nahi nuke: beti ikasten gaudelako irudia. Izan ere, pentsatzen dut, mota bateko edo besteko proiektu berriekin ausartzen garenean, nolabaiteko pilotaje fase iragangaitzean gaudela. Eta, jakina, Benitok dioen moduan, ikasten ari denak ezer gutxi du esateko, aditu horien aurrean.

Zugatik ez

Benito — Wed, 23 Apr 2008 12:39:24 +0200

Trankil Ainhoa, "kanpotik" horretan ez zaitut zu sartu . Gehiago esan nahi nuen kanpoko munduan zabiltzatenok inguruan inpresio hori berori sumatzen duzuen, alegia, euskaltegietatik gauza gutxi zabaltzen direla.

Nik neuk barrutik inpresio hori daukat. Egia esanda, gure artean gauzak zabaltzeko foro gutxi dauzkagunean, zaila da kanpora ere zabatzea. Moodle-en kasuan adibidez, euskaltegien inguruan hainbat gauza egiten ari direla jakina da.

Gero, aipatu dituzun faktoreei beste batzuk gehituko nizkieke:

Publikoan jarduteko ohitura-konfidantza falta. Foro horiek nahikoa serioak eta formalak izaten dira, eta errespetua ematen diote jende askori. Bere lanak han esan behar direnen aldean ezer gutxi izango delakoan ez da erraz ausartuko.
Gauzak zabaltzeko mesfidantza. Uste dut oraindik ere badagoela "informazio garrantzitsua konpententziaren esku" uztearen sindromea. Oso handia ez seguruenik, baina zerbait badabilela egingo nuke. Bai?

Zer uste duzue zuek?

Beno, egia esan neu utzi

Ainhoa — Wed, 23 Apr 2008 11:32:47 +0200

Beno, egia esan neu utzi nauzu orain pentsatzen... Ez nago ziur "kanpotik" ala "barrutik", non kokatu neure burua.

Euskaltegian lanean pasa ditudan urteetan oso esperientzia politak ikusi ditut, hausnarketa interesgarriak eta material onak. Lankide ikaragarri onak izan ditut inguruan, jakintsuak eta trebeak eskoletan.

Orain unibertsitatean nagoela, ikusten dut jardunaldi eta kongresuetan parte hartzeak garrantzi handia duela lana zabaltze aldera, bestela ahalegin guztia etxe barruan geratzen da.

Zorionez, hau bezalako blogek edo Didakteka bezalako ekimenek aukera ematen dute jakintza hedatzeko, baina askotan, didaktikari lotutako jardunaldietan faltan izaten ditut euskaltegietan egiten diren ekimenen aurkezpenak, euskaltegietatik kanpokoek ere balia dezaten jakintza hori.

Bai, badakit euskaltegietako irakasleon lan-zamak ez duela askorako tarterik ematen :( baina inor animatuko balitz behintzat jakin dezala oso ongietorria izango dela.

Eskerrik asko

Benito — Tue, 22 Apr 2008 19:49:05 +0200

Eskerrik asko Ainhoa, informazioagatik eta gonbidapenagatik. Ea joateko modua daukagun.

Pentsatzen utzi nauzu honekin: "Badakigu euskaltegietan ez dagoela ohitura handirik egindako lana publikoki aurkezteko".

Barrutik hala dela esango nuke, baina kanpotik ere horrela ikusten gaituzte?

Errepasoa egiten ikasten plataforman sartu naiz, baita AEKren E-gelan ere, eta ikastaroak makina bat sortu da azkenotan, ez dakit zelan dabiltzan, baina egin, zerbait egiten da duda barik.

Mila esker Plisti (Plasta barik)

Benito — Sat, 30 Jun 2007 18:59:18 +0200

Horixe ba, eskerrik asko kronika-balantzeagatik (azkenean zer gutxi zabaldu da kontu hau blogosferan, ezta?).

Jardunaldien itzaletan aipatu dituzun kontuak direla eta, instituzionalizazioa, formatoa... formazioan, transmisioaren eta ezagutzaren zabalkundeaz aspaldion darabiltzadan gogoetatxo pare bat ekarri nahi nituzke, labur-laburrean:

Akademizismo zurrunegia ez ote gabiltza erabiltzen horrelakoak antolatzeko orduan? Ditxosozko ezagutzaren demokratizazioak ez luke formato desberdinak ere jorratu beharra ekarri beharko? Gogora etorri zaizkit Barcamp-ak adibidez. Zerbait hurbilagoa, eta, serioa izan barik, hurkoago suertatzen dena.
Transmisioa aipatu duzu, ez da azken batean goitik beherako eredu formatiboa? Dakienak ez dakienari instrukzioak eman, edo halako zerbait. Honekin ez ote gabiltza elitismo antzeko zerbait sustatzen?
Gurean ez dago ardura handiegia ikerketak, ezagutza eta foramazioari zigiluak ipintzeko? Agerraldi ofizialak egiteko eta zenbatzeko? Halakoak aplikatu, landu eta transmititzeko bideak ez dira gutxiegi lantzen?

Mahai gainean utzi nahi dut kontua, besterik gabe. Kezkak baino ez dira. Elitismoan jaustea bezain arriskutsua da populismoan jaustea, baina oreka punturen bat egon behar da.

Moodle Mootetik bueltan

plisti-plasta — Sat, 30 Jun 2007 11:13:12 +0200

Moodle Mooten izan nintzen eta bi egunotan bizitakoei bueltatxo bat eman ondoren, bertan izandako argiak eta itzalak (argiak nagusitu dira) azaltzen saiatuko naiz.

Itzalak

Jardunaldiak gehiegi oinarritu dira transmisioan. Bertan izandokook arrazoi ugari ditugu "Powerpoint"a eta, batez ere, beronen erabilera eskasa gorrotatzeko. Komunikazio gehiegi, era tradizionalegian egituratutakoak (sarritan egindakoaren memoria tankerakoak), benetako mahaingururik ez, tailerrak birplanteatu beharra...

Denboren banaketa demokratikoegia. Badakit iritziak iritzi direla. Baina denok pentsatu genuen zenbait komunikaziok denbora luzeagoa eskatzen zutela eta beste batzuek, aldiz, laburragoa (soberako zenbait ere egon ziren).

Planteamendu instituzionala. Itzaletan jarri dut baina alde argian ere jar nezakeen. Zera esan nahi dut: iruditu zitzaidan badirela, unibertsitatean batik bat, mugimendu librezale bat didaktika berriari atxikia eta beste bat ofizialagoa nekez irensten duena haize berria (bere burua zuritzen aritzen den horietakoa) bi adarrok bertan agertzea aurrerapausua izan liteke eta egokia deritzot baina zenbait komunikazio "ofizialegiak" ziren. "Dena ondo dago, dena aurrera doa" tankerakoak eta ez dakit nik ba...

Gehiegi ardaztu ziren unibertsitatearen munduan. Halabeharrez, agian; ezen partaide gehienak unibertsitateko irakasleak baitziren eta suposatzen dut komunikazio posible gehienak ere mundu horretakoak zirela. Ez dut zalantzarik ahalegin bereziak egin direla hau horrela izan ez dadin (oso tratamendu ona eman zitzaien unibertsitatetik kanpokoei) diodan gauza bakarra da esparrua oraindik gehiago zabaldu beharra dagoela (ez da erraza izango, ez).

Argiak

Antoaketa zaindua eta "mimatua"... "kariñoz" egindakoa; badakizue niri kontu hauek funtsezkoak iruditzen zaizkidala motibazio emozionalaren garrantzia itzela dela uste dudalako.

Oso jende interesgarria eta mugimendu berriztaileak ezagutzeko aukera izan genuen: librezaleak, konpromiso didaktiko eta pertsonal handikoak, ideiak eta norabidea argi dituztenak...

"Didaktikoak" eta "teknikoak" (asko eta asko mixtoak ere bai..."krak" batzuk dira) elkarrekin aritzeak etekin ugari eman lezakeen uztardura ahalbideratzen du.

Nik neuk aprobetxatu ez nuen arren, "hirugarren denbora" egoki planteatuatutakoa iruditu zitzaidan: sagardotegiaz ari naiz. Jaka kendu eta modu informalean aritze horrek oso ondo osatzen du modu formaleko komunikazioa (bikaina iruditu zitzaidan programatuta egotea)

Pare bat ondorio

Argi ikusi zen didaktikan azpimarratu beharra. Askok eta askok Moodle arropa didatiko zaharra eskegitzeko erabiltzen baitute (eta horrelakorik ere ikusi zen).
Moodle bere lekuan ipini behar da. Gaur gaurkoz "sare sozial itxiak" sortzeko balio du baina 2.0 sare zozial zabaletan integratzea ahalbideratu behar dugu. Ez naiz honetan luzatuko zeren aritu izan gara "Blogak, Moodle eta enparauak" gaiaren inguruan hementxe bertan eta erabat ados nago, gainera, Ainhoak (bikaina baino bikainagoa bere lana eta partaidetza moodlemooten) "Moodle eta PLE mezuan" esandakoekin.

Eta jarraituko nuke (asko dira aipatu gabekoak) baina berriro ere nire "plasta" izaera nagusitu zaidalakoan nago eta oporretan nagoela kontuan izanda ez dakit burutik sano-sano nagoen baina bueno...

Ederto Ainhoa! Programa eta

Benito — Sat, 12 May 2007 21:51:13 +0200

Ederto Ainhoa! Programa eta antolatzen dabilen jendearekin ez da galtzekoa izango.

MoodleMoot Euskadi 2007

Ainhoa Ezeiza — Sat, 12 May 2007 21:35:07 +0200

Kaixo!

bai, hala da, Euskadin antolatuko den lehenengo Moodle jardunaldiak egingo ditugu, eta benetan pozgarria litzateke euskaltegiko jendea bertaratzea, batez ere zuetako batzuok eskarmentu luzea duzuelako plataforma erabiltzen.

Gauza jakina da datorren ikasturtetik aurrera hala nahi duten euskaltegiek Moodle erabili ahal izango dutela beren betiko saioen lagungarri gisa edo online ikastaroak antolatzeko. Lehenengo jardunaldi hauetan asmo nagusia da elkar ezagutzea, esperientziak trukatzea eta, ahal bada, elkarlanerako bideak urratzea. Horretarako, ponentzia eta komunikazio zenbaitzuez gain, tailer moduko saioak antolatuko ditugu diseinatutako ikastaroak ikusteko eta ideiak trukatzeko.

Programaren oinarria definituta dago, komunikazioak zehaztea falta da, baina hori jendeak bidaltzen dituen laburpenak ikusita erabakiko dugu. Jordi Adell izango dugu geurekin, baita Rovira i Virgili Unibertsitateko Javi Legarreta ere. EHUkook hartu dugu gidaritza, baina egia esan, Deustukoekin eta Mondragon Unibertsitatearekin elkarlanean gabiltza, baita inguruan ari diren beste eragile batzuekin ere: Axular Lizeoa (aupa Juan ;-)), Ordiziako IKTeroak (Maite, afarira behintzat etorriko zara!), Software Libreko Euskadiko Enpresen Elkartekoak (ESLE)...

Ilusio handiz ari gara eta ilusio hori kutsatzeko esperantzan. Euskaltegietan ez dugu ohiturarik komunikazioak aurkezteko, baina behintzat zuen esperientziaren laburpena idatziko bazenute, ikusiko genuke non txertatu zuen proposamena.

Informazio gehiagorako, webgune honetara jo dezakezue: http://jmoodle07.ehu.es edo bestela zuzenean nigana: ainhoa.ezeiza@ehu.es

Uff, luze samar atera zait!! Mila esker Karrajuakooi lekutxo hau eskaintzeagatik :D

Bai, egia esanda geurea

Karrajua — Fri, 17 Nov 2006 16:26:20 +0100

Bai, egia esanda geurea kontatzeko presarekin kontua nondik datorren ondo azaldu gabe utzi dut. Badakizu, blogeoaren azelerazioa. Eskerrik asko azalpenagatik. Ikerketa horren zain geratzen gara. Lehenago zerbait aurreratzen ez badiguzue behintzat.

emandako informazioa osatuz

IÃ±aki Murua — Fri, 17 Nov 2006 14:41:46 +0100

Benito, ematen duzun informazioa osatze aldera:

Egitasmoa eta Memoria taldea 2002ko abenduan jarri zen abian HABEren Irakaslearen gunean, plan zabalago baten baitan; lau urteko ibilbidea du, alegia. Hau honela, eraberritzearen emaitza da aipatzen duzun Erakunde Planteamenduak lan-taldea.
Erakunde hezitzaile bakoitzak izendatu ditu bere ordezkariak "Egitasmoa eta memoria" taldean orain arte. Bestela esanda, partaidetza borondatezkoa izan da. Alderdi honetan ez dago oraingoz aldaketarik: taldea itxia izango da baina atxikitzea askea.
Hausnarketarako tarteak izan ditugu urteotan eta, besteak beste, partaidetzaren inguruko ikerketa burutu dugu aurtengo udaberrian. Ikerketa horren berri HIZPIDE aldizkarian ateratzear dago. Hartu diren erabakietarako baliagarri izateaz gain, kanpoko foroetan izan du oihartzunik, EDUTEC kongresuan esaterako.

Adeitasunez,

Iñaki Murua

Eskerrik asko

Karrajua — Wed, 08 Nov 2006 17:57:51 +0100

Eskerrik asko azalpenagatik.

Gaizki ulertu edo okerrak zuzendu nahian

HABE — Wed, 08 Nov 2006 16:54:33 +0100

Ez da gure nahia izan Moodle plataformaren jabetza intelektualaren eskubideak HABE eraundearenak direla esatea. Atariko "elementu guztien" jabetza intelektualaren eskubideetaz ari garenean, atariko edukiak ditugu buruan. Moodle plataformak http://docs.moodle.org/es/Licencia helbidean lizentziari buruz adierazitakoak irakurri ondoren, ez dugu uste izan Legezko Oharran aipatutakoak zuzenak ez zirenik. Dena dela, gaia aztertzen ari gara, eta gaizki ulerturik egon bada edo okerrik egin badugu, hauek konpontzen saiatuko gara.

Probatu beharko da

Karrajua — Tue, 31 Oct 2006 00:34:34 +0100

Bai, arrazoia, komunitate birtualak web2.0 eta ELearning 2.0 deitzen hasi denaren ezaugarri dira. Second Life Elgg-en planteamendura hurbiltzen da adibidez: komunitate birtualak non interesen arabera erabiltzaileek eurek komunitate txikiak sortu ditzaketen, informazioa, artxiboak eta ideiak konpartituz eta elkartrukatuz. Moodle eta halakoak gaindituta halako teknologientarako joera ei dago. Horrela bada, Elgg eta Moodle-en integrazioa etorri den bide beretik dator hau ere seguraski. 3Dren espektakularitatea motibatzeko tresna interesgarria izan daiteke duda barik, hori bai, oraindik orain eskakizun tekniko handiagoak eskatzen ditu bai erabiltzaile mailan, bai zerbitzari mailan (banda zabalera handiagoa, grafiko-txartelak, ...). Dena dela, ez dut Sloodle hori probatu oraindik. Ea bihar-etzi osteratxoa egiteko modua daukagun. Zuk probatu duzu? Zelan?

Bidez batez, eskerrik asko ekarpenagatik, lehen esatea ahaztu egin zait eta.

Sloodle

Alonso — Mon, 30 Oct 2006 20:03:37 +0100

Ados. 2.0 egiten duena ez da hainbeste ingurunea. De la Torrek dioenez gehiago da edukien elkartrukea, bertan idatzi, parte hartu eta editatzeko aukera eskaintzea, dinamikotasuna, edozein nabigatzailetan bistaratu ahal izatea eta Rssa... (http://www.educandonos.cl/node/453)

docencia.es atarian dator Moodle egokitu horrena (horra linka zuzen jarrita: http://www.sloodle.com)eta esaten dutenez "Second Life es una de las famosas aplicaciones web 2.0."...

Secon Life bizitza birtuala antolatzeko komunitate eta ingurune birtuala da, "bideo joko batetik abiatuta 'metaverso' bat sortu nahi duena" -un mundo virtual generado por ordenador donde los usuarios conectados crean sus propios cuerpos tridimensionales, presentan sus obras de arte, conversan entre sÃ o hacen negocios...-(http://tinyurl.com/yh3s4r)

Beraz, ingurune horren barruan ikastaroak sortu eta bertan "edonori parte hartzeko aukeraren bitartez informazioa elkartrukatu eta osatzeko aukera eskainiz modu kolaboratiboan aritzeko modua" eskeiniko balitzaio -Wikipediak dixiten moduan- bai moodleen, bai sloodlen baita bogan ere e-learning 2.0. litzateke ezta?

Edozein modutan ere, egia da Sloodle honek dakarrena, batez ere, 3 dimentsiotako edukiak direla. Nolakok diren ez dakit, neuk ere ez dut probatzrik lortu.